„Едмонд де Ротшилд“ предупредува на ризик што сè повеќе ги загрижува инвеститорите

Швајцарскиот управител со средства „Едмонд де Ротшилд груп“ (Edmond de Rothschild Group) од летово добива сè повеќе прашања од клиенти загрижени поради сè поинтензивната сезона на шумски пожари во Европа, која го менува начинот на кој инвеститорите ги проценуваат ризиците за своите портфолија во регионот.

„Особено клиентите на приватното банкарство поставуваат сè повеќе прашања“, рече Ерик де Тесиер, директор за одржливост во „Едмонд де Ротшилд“, кој управува со средства во вредност од околу 250 милијарди долари.

Една клиентка чие портфолио е насочено кон Европа, на пример, „многу конкретно праша дали тоа влијае врз вредноста на нејзиното портфолио со недвижности, особено врз одделни недвижности во него“, рече Де Тесиер во интервју.

„Ако премиите за осигурување пораснат премногу или ако недвижноста стане потешка за изнајмување, тоа неизбежно ќе влијае врз нејзината вредност“, додаде тој.

Коментарите доаѓаат по серијата екстремни топлотни бранови што покажаа колкав дел од Европа е неподготвен за шумски пожари, суши и други последици од големите горештини.

Економистите предупредуваат дека горештините краткорочно ќе му наштетат на европскиот економски раст бидејќи влијаат врз сè, од продуктивноста до цените на суровините. Инвеститорите сега се обидуваат да проценат што значи сето тоа за нивните портфолија.

„Настаните од ова лето, топлотните бранови и шумските пожари, ни овозможија повторно да ја отвориме таа тема со клиентите“, рече Де Тесиер. „Бидејќи нашите клиенти главно се од Европа, прашањата од ова лето навистина пристигнуваат многу почесто, далеку почесто отколку за време на големите пожари во Лос Анџелес.“

Де Тесиер вели дека „Едмонд де Ротшилд“ сега планира почесто да ја проценува вредноста на портфолијата за да утврди кои средства се најизложени. „Тие ризици поврзани со климатските промени ќе влијаат врз цената или привлечноста на одредени средства.“

Растот на температурите во Европа, континентот што се загрева најбрзо во светот, веќе поттикна предупредувања од осигурителите, пензиските фондови и централните банки. Европската централна банка (ЕЦБ) го приспособува начинот на кој го вреднува обезбедувањето што банките го користат во операциите за обезбедување ликвидност поради влијанието на климатските промени врз вредноста на средствата.

Истовремено, пазарите сè уште не ги вклучиле долгорочните климатски ризици во цените, изјави овој месец Луиз Куи-Хенкел, глобална директорка за одржливи и транзициски решенија во „Блекрок“ (BlackRock).

Де Тесиер вели дека неговите тимови „сè уште анализираат и се обидуваат да разберат“ како последиците од растот на температурите „се шират низ одделни сектори и географски области. Кога ќе ја завршат таа анализа, тогаш ќе се носат конкретните инвестициски одлуки.“

„Управителот со средства исто така се обидува да добие „поголем пристап до податоците на осигурителите и реосигурителите и подобар увид во нив“, рече тој.

Меѓу професионалните инвеститори сè повеќе се зголемува потребата „за дополнителни податоци за да можат да го проценат влијанието на физичките ризици врз принудниот прекин на работењето, но и врз целиот синџир на вредност на одредена компанија. Истото тоа важи и ако климатска катастрофа се случи во друг дел од светот каде што компанијата има голем број доставувачи.“

Истовремено, „Едмонд де Ротшилд“ сака да инвестира во компании што би можеле да профитираат од претстојните ризици.

„Нашите тимови исто така работат на препознавање на инвестициските можности што произлегуваат од тие физички климатски ризици“, рече Де Тесиер. Како пример ги наведе компаниите што развиваат решенија за разладување што ги надминуваат класичните системи за климатизација, особено за индустриските објекти.

„Тука се и компаниите што нудат цела низа решенија за борба против пожари, на пример, производителите на огноотпорни производи“, рече тој. „Тоа се можности што нашите управители на портфолија ги препознаа и продолжуваат да ги бараат.“