Европа ги брои жртвите од најтоплото лето: горештините однесоа повеќе од 34.000 животи

Повеќе од 34.600 луѓе починале ова лето од последиците од горештините во пет земји од Западна Европа, која ги забележа најтоплите јуни, јули и август откако постојат мерења, покажува анализата на „Блумберг“ на податоците за смртноста од повеќе извори.

Шпанија го имала најсмртоносното лето откако податоците се следат од 2015 година. Меѓу 15 мај и 30 септември биле забележани 5.805 прекумерни смртни случаи што може да им се припишат на горештините, според податоците на Институтот за здравје „Карлос III“, објавени во четвртокот. Во Франција, три топлотни брана, според проценките, однеле 7.824 животи, што е најголем број најмалку од 2015 година, покажуваат прелиминарните податоци на француската агенција за јавно здравје. Зголемена смртност поврзана со горештините забележале и Германија, Обединетото Кралство и Белгија.

„Шпанија ова лето забележа 61 ден со топлотни бранови, со четири топлотни брана во текот на летото, петти во септември, како и периоди на екстремни горештини уште во мај“, изјави Дијана Гомез, раководителка на системот за следење на смртноста при Институтот „Карлос III“. „Сето тоа доведе до зголемување на бројот на смртни случаи што може да им се припишат на горештините.“

Горештините можат да ги влошат постојните здравствени проблеми, а особено се опасни за ранливите групи, меѓу кои се малите деца, постарите лица и работниците кои подолго време се изложени на високи температури.

Западна Европа во текот на целото лето беше погодена од исклучително високи температури. Просечната температура во регионот била за 2,5 целзиусови степени повисока од просекот за периодот од 1991 до 2020 година, според најновиот месечен извештај на европската програма за набљудување на Земјата „Коперникус“.

 Bloomberg

Европските податоци покажуваат дека летните температури оваа година во речиси цела Англија, Велс и Белгија, како и во поголемиот дел од Франција, Шпанија, Италија, Швајцарија и Австрија, биле највисоки откако постојат достапни податоци, кои датираат од 1979 година. Претходниот рекорд бил забележан во 2003 година, кога земји како Обединетото Кралство, Франција и Германија забележале десетици илјади смртни случаи поврзани со горештините. Здравствените системи тогаш тешко се справувале со големиот број случаи на топлотен удар, што ги поттикнало властите да го подобрат одговорот на службите за итна помош и мерките за периодите на екстремни горештини.

Најмалку 60 отсто од Западна Европа оваа година во текот на 17 дена била изложена на температури повисоки од 30 Целзиусови степени, покажува извештајот на „Коперникус“ објавен во петокот. Во текот на летото 2003 година имало 11 такви дена. Рекордни 52 отсто од европскиот континент ова лето биле изложени на температури од најмалку 38 степени, што според скалата на „Коперникус“ се смета за „многу силен“ топлотен стрес.

Во Шпанија, бројот на смртни случаи поврзани со горештините ова лето за повеќе од илјада го надминал претходниот рекорд од 2022 година, утврдил Институтот за здравје „Карлос III“. Најтежок бил 10 јули. Институтот ја пресметува прекумерната смртност споредувајќи го дневниот број на починати со просечната стапка на смртност од претходните години, земајќи ги предвид и температурните прагови за секоја од 50-те шпански покраини.

„Температурните прагови во сите покраини беа надминати во текот на голем број денови“, изјави Гомез. „Нашиот систем е единствениот што секојдневно објавува процени, а со оглед на големото искуство што го имаме во оваа област, во последните денови ни се обратија неколку европски земји.“

Во Германија бројот на починати го достигнал највисокото ниво во последните десет години. Според податоците на Институтот „Роберт Кох“, федералната агенција задолжена за контрола на болести, меѓу 6 април и 13 септември биле забележани околу 16.000 смртни случаи поврзани со горештините. Околу 9.600 луѓе починале за време на топлотниот бран кон крајот на јуни, најтешкиот досега забележан во Западна Европа. Претходниот германски рекорд бил околу 9.000 смртни случаи поврзани со горештините во 2018 година.

Прелиминарните податоци на француската агенција за јавно здравје покажуваат дека бројот на смртни случаи поврзани со горештините ова лето бил највисок откако постојат споредливи податоци, кои датираат од 2015 година. Франција ја погодиле три големи топлотни брана, во јуни, јули и август. Агенцијата би требало да ги објави конечните податоци за смртноста на почетокот на следната година.

За споредба, минатата година биле проценети околу 5.700 смртни случаи поврзани со горештините. За време на екстремно жешкото лето во 2003 година, истражувачи од Универзитетот „Париз 5“ утврдиле дека само во август биле забележани 14.800 смртни случаи.

Во Обединетото Кралство, топлотните бранови во мај и јуни оваа година, според процените на британската Агенција за здравствена безбедност, предизвикале 2.877 смртни случаи. Конечниот извештај за целата сезона би требало да биде објавен следната година. Во Белгија, меѓу 18 јуни и 12 јули починале 2.112 луѓе, според податоците на тамошниот институт за јавно здравје.