Катастрофите стануваат инвестициска можност

Хеџ-фондот ФЦМ (Fermat Capital Management) предвидува дека пазарот на обврзници поврзани со катастрофи (cat bonds) годинава ќе порасне за 20 отсто, бидејќи овој финансиски инструмент, базиран на природни непогоди, добива сè поголемо значење во светот што сè повеќе го обликуваат екстремни временски услови, голема густина на население и инфлација.

„Пазарот достигна пресвртна точка“, изјави Џон Сео, коосновач и извршен директор на ФЦМ во интервју.

„Клучен фактор е инфлацијата“, рече тој, додавајќи дека поради неа трошоците за обнова на имот уништен од природни катастрофи во Европа и во САД стануваат значително поголеми.

Предвидувањето на ФЦМ укажува дека пазарот на обврзници за справување со катастрофа, кои ги издаваат осигурителни компании за да го префрлат екстремниот ризик на пазарот на капитал, би можел да достигне околу 60 милијарди долари до крајот на 2025 година.

Во тој контекст, производот што некогаш беше резервиран само за најсложените институционални инвеститори, денес привлекува и поширок круг на вложувачи.

ФЦМ беше еден од првите фондови што овозможија пристап до обврзници за справување со катастрофа преку UCITS фондови, кои се достапни и за мали инвеститори. Годинава беше лансиран и првиот ЕТФ во светот базиран на обврзници за справување со катастрофа.

Инвеститорите во овие обврзници ризикуваат губење на вложениот капитал доколку се случи однапред дефинирана катастрофа, но доколку не се случи тоа, добиваат високи приноси. Структурата на обврзниците исто така овозможува добри резултати во периоди на раст на приносите на американските државни обврзници. Според индексот составен од „Свис Ре“ (Swiss Re), обврзниците за справување со катастрофа во изминатата година донеле принос од околу 14 отсто.

„Ова беше доста мирен период за пазарот на обврзници за природни непогоди“, коментира Марија Добреску, виша советничка во компанијата „Морнингстар“ (Morningstar).

Bloomberg

Растот на пазарот на обврзниците за справување со катастрофа доаѓа со одредена реорганизација на силите. Минатиот месец хеџ-фондот ФЦМ беше ненадејно исклучен од соработката долга две децении со компанијата ГАМ (GAM Holding), во чии рамки заедно управуваа со портфолио од обврзници за справување со катастрофа вредно три милијарди долари. Наместо ФЦМ, ГАМ реши да се здружи со подружница на „Свис Ре“, еден од главните издавачи на обврзници за справување со катастрофа, за да го преземе управувањето со фондовите.

По одлуката на ГАМ да ја прекине соработката, следуваа значајни промени во тековите на капитал меѓу двете компании. Од крајот на март до крајот на април, фондовите со кои управува ФЦМ привлекле нови 1,1 милијарда долари, додека фондовите под управување на ГАМ забележале повлекување на клиенти во износ од речиси 1,2 милијарда долари.

Ром Авив, раководител на одделот за хартии од вредност поврзани со осигурување во ГАМ, на почетокот на мај изјави дека откупите се „многу чести за време на структурни промени и промена на управувачи“. Но тој додаде дека партнерството со „Свис Ре“ веќе предизвикува интерес кај клиентите.

Сео тогаш изјави дека клиентите изразиле „разбирлива загриженост“ поради ненадејната и еднострана одлука на ГАМ за прекин на соработката.

Џон Сео Bloomberg

Од „Свис Ре“ порачаа дека во тој развој на настаните гледаат можност за дополнителни иновации и проширување на понудата на производи.

„Пазарот не расте само по големина туку и по разновидност на спонзори и типови ризици што се пренесуваат“, рече Кристофер Минтер, раководител на СРАКП (Swiss Re Alternative Capital Partners).

Сео нагласи дека „Свис Ре“ со тоа покажува ново ниво на сериозност и додаде дека пазарот расте со таква брзина што „има доволно работа за сите“.

Прашање на големина

Партнерството меѓу ГАМ и „Свис Ре“ го доведе портфолиото на хартии од вредност поврзани со осигурување (ILS) под сопственост на „Свис Ре“ на 6,9 милијарди долари, од кои 3,7 милијарди долари се однесуваат на обврзници за катастрофи.

„Би бил многу разочаран доколку во краток до среден рок не бидеме недвосмислено меѓу водечките на ILS-пазарот“, изјави Кристофер Минтер.

ФЦМ во моментов управува со портфолио вредно 10 милијарди долари, претежно фондови на обврзници за справување со катастрофа, додека ТС (Twelve Securis), формиран со спојување на ТЦ (Twelve Capital) и „Секурис“ (Securis), управува со 8,5 милијарди долари, од кои шест милијарди се во фондови на обврзници за справување со катастрофа, а остатокот во приватни ILS-договори.

Според Етиен Шварц, главен инвестициски директор за ликвидни хартии од вредност во TС, големината на портфолиото е клучна за справување со комплексноста на фондовите на обврзници за справување со катастрофа - од софистицирани модели на ризик до усогласеност и дистрибуција на фондовите.

„Ако сакате да привлечете институционални инвеститори, морате да имате обем“, рече тој.

Опасности на хоризонтот

Обврзниците поврзани со временски непогоди ја преживеаја минатогодишната ураганска сезона без поголеми последици, но метеоролозите за годинава предвидуваат поактивна сезона во Атлантикот, со можност за три до пет големи бури.

Марија Добреску предупредува дека климатските промени го отежнуваат моделирањето на ризиците за пазарот на обврзници за справување со катастрофа.

„Некои екстраполации можеби повеќе не важат“, изјави таа. „На долг рок, тешко е да се предвиди какви точно ќе бидат приносите“.

 Bloomberg

Во „Свис Ре“ планираат да одговорат на оваа неизвесност со користење 190 сопствени модели на ризик за различни видови катастрофи, со поддршка на тим од 50 научници специјализирани за моделирање катастрофални ризици.

Мариаџована Гватери, директорка на СРИИА (Swiss Re Insurance-Linked Investment Advisors), ја отфрла загриженоста за потенцијален судир на интереси, бидејќи „Свис Ре“ е истовремено и издавач и управувач на фондови на обврзници за справување со катастрофа.

„Постојат многу строги правила и процедури што ги раздвојуваат тие две функции“, рече таа.

Пазарот продолжува да расте

„Обврзниците поврзани со катастрофи ја пополнуваат празнината меѓу зголемената побарувачка за реосигурување и намалениот капацитет на реосигурителите да го преземат тој ризик“, вели Џон Сео. Главен двигател на овој тренд, додава тој, е порастот на цената за обнова по катастрофи.

„Инфлацијата во последните пет години ја зголеми основната изложеност на ризик за 50 отсто во номинални долари“, вели Сео.

Според податоците на „Блумберг интелиџенс“ (Bloomberg Intelligence), пазарот на обврзници за справување со катастрофа се има удвоено во последните десет години, а учеството на малите инвеститори во фондовите UCITS се зголемило од 12 отсто во 2015 на 30 отсто од почетокот на 2025 година.

Во моментов нема коментари за веста. Биди прв да коментира...

Остави коментар