text size
Потрошувачката за козметика и производи за лична нега во Европа до крајот на 2025 година ќе ја надмине сумата од 140 милијарди евра. Но, додека индустријата расте, расте и притисокот врз брендовите да понудат поодржливи производи и потранспарентни податоци. Проблемот е што дури 51 отсто од европските потрошувачи не веруваат дека „еко“ ознаките на амбалажата навистина го одразуваат реалното влијание на производот врз животната средина.
Токму во тој вакуум помеѓу растот на пазарот и падот на довербата се појави „Екобјути скор“ (EcoBeautyScore) – систем кој треба да внесе ред во шумата на „зелени“ тврдења и на потрошувачите да им даде јасни, научно засновани оценки за влијанието на производите врз околината. Брендови како „Лореал“, „Нивеа“ „Еуцерин“ „Гарниер“, „Неутрогена“ и многу други веќе го користат на некои европски пазари, а наскоро пристигнува и во Хрватска.
„Лореал е еден од иницијаторите на целиот проект“/Блумберг
Од најава до први резултати
На хрватската веб-страница на „Нивеа“, „Екобјути скор“ треба да се појави најдоцна до крајот на годината, потврдуваат од „Баерсдорф“, сопственикот на брендот. Засега оценките се видливи во Франција, Германија и Велика Британија, додека останатите пазари постепено се приклучуваат. „Лореал“, кој е еден од иницијаторите на целиот проект, засега не открива кога точно алатката ќе биде достапна и во Хрватска, но може да се очекува наскоро.
„Воведувањето на системот за оценување „Екобјути скор“ претставува важна пресвртница на колективната отвореност и одговорност во целиот сектор на козметиката. На овој начин започнува напредокот: со заедничка рамка, јасно комуницирање на точни податоци и посветено информирање за подобри избори за планетата“, вели Кристијан Хорват, член на управата и директор за трансформација на бизнисот во „Лореал Адрија-Балкан хаб“.
Сепак, иако идејата е амбициозна, системот засега ги опфаќа само четири категории производи – шампони, регенератори, гелови за туширање и нега на лице.
„Нивеа“ меѓу првите се пофали со оценките – дури 99 проценти од производите од линијата за нега на лице добиле А или Б. Таквиот резултат сугерира дека промените во составот и пакувањето биле направени навреме.
„Станува збор за многу сеопфатен и долгорочен процес на трансформација низ целиот синџир на вредности, што значи дека значајни прилагодувања во составот и пакувањето веќе се спроведени со јасна цел за намалување на еколошкиот отпечаток на производите“, порачуваат од компанијата.
Бенедикт Лауфенберг, менаџер за „Адријатикс“, нагласува дека „Нивеа“ сака да ја зачува довербата што ја ужива меѓу купувачите.
„Довербата што потрошувачите ја имаат кон брендот „Нивеа“ за нас е од непроценлива важност и настојуваме континуирано да ја негуваме преку научно засновани и отворени практики. Токму „Екобјути скор“ е важен чекор во таа насока бидејќи им овозможува на потрошувачите јасна и објективна споредба меѓу различни категории“, изјави Лауфенберг.
Транспарентност или само нова етикета?
Она што го разликува „Екобјути скор“ од низата постоечки „еко“ ознаки е фактот што системот е создаден во соработка на повеќе од 70 компании, а методологијата се темели на насоките на Европската комисија. Се оценуваат 16 еколошки димензии – од емисија на јаглерод и потрошувачка на вода до користење на ресурси – и при тоа се користи пристап заснован на податоци.
„Лореал“ , кој во 2022 година беше меѓу иницијаторите на конзорциумот, во тоа гледа можност за воспоставување заеднички јазик.
„Овој пристап има глобален опфат и може да им помогне на потрошувачите да добијат јасни, транспарентни и споредливи информации за влијанието врз животната средина, засновани на заедничка научна методологија. Тој заеднички напор резултираше со лансирање на алатката „Екобјути скор“ во 2025 година“, истакнува Хорват.
Но прашањето останува – дали потрошувачите ќе го прифатат „Екобјути скор“ како веродостојна ознака или ќе го доживеат како уште една во низата? Скепсата кон „гринвашинг“-от не исчезнува преку ноќ, а индустријата ќе мора допрва да се докажува.
„Екобјути скор“ треба да се појави на производите на „Нивеа“ најдоцна до крајот на годината | Блумберг
Зад „Екобјути скор“ стојат и долгорочни цели што компаниите веќе порано ги имаат зацртано. „Лореал“, на пример, сака до 2030 година 95 проценти од состојките во формулите да бидат био-базирани, рециклирани или добиени од одржливи извори. Фокусот им е и на водата. Имено, производите кои бараат помало плакнење, како иновацијата „Лореал вотер сејвер“ (L’Oréal Water Saver), треба да помогнат во намалување на потрошувачката во регионите кои веќе чувствуваат недостиг.
Што се однесува до амбалажата, целта е до 2030 година да се преполови користењето на девствена пластика и истовремено да се зголеми уделот на рециклирани и био-базирани материјали. Дел од тие напори се финансираат и преку Фондот за кружни иновации, вреден 111 милиони евра, во кој „Лореал“ е еден од главните инвеститори.
„Нивеа“ пак нагласува дека „Екобјути скор“ ќе се проширува и на нови категории, а одржливоста останува клучна одредница. Но, и самите признаваат дека тоа е „многу долгорочен процес“ и дека промените ќе бидат постепени.
„Екобјути скор“ ќе се шири и на нови категории | Блумберг
Потрошувачите сакаат докази
Интересот за одржливост е сè поизразен, но довербата во „зелените“ тврдења на брендовите сè уште не е без задршка. Купувачите сакаат да знаат што стои зад етикетата, а не само да веруваат на збор.
„Нашите потрошувачи, како во светот така и во Хрватска, покажуваат високо ниво на свесност и очекувања. Нашата улога е да им одговориме и да придонесеме за уште поголема свесност преку едукација, подигајќи го нивото на знаење за заедно да направиме уште повеќе за нашата планета“, вели Хорват.
Засега, „Екобјути скор“ дава барем рамка – потранспарентна и поконзистентна од постојните маркетиншки тврдења. Но неговата вистинска сила ќе се види дури кога системот ќе заживее глобално и ќе ги опфати сите категории. Останува да се види дали ознаките од A до E ќе заживеат како мерило за одржливост или потрошувачите ќе ги доживеат само како уште еден маркетиншки трик.
.webp){kind=icon}
