Продажбата на автомобили во Европа благо се зголеми минатиот месец, а сè повеќе купувачи се насочуваат кон електрични модели, поттикнати од новите субвенции и сè поширокиот избор на возила по достапни цени.
Регистрациите на нови возила во февруари се зголемија за 1,7 отсто во споредба со истиот период минатата година, на вкупно 979.321 возило, соопшти во вторникот Европската асоцијација на производители на автомобили. Растот го предводеа пазарите на Германија, Шпанија, Италија и Обединетото Кралство, додека Франција забележа пад од речиси 15 отсто.
Електричните возила продолжија да растат значително побрзо отколку што паѓа продажбата на бензински и дизелски автомобили. Во Германија продажбата на возила со можност за напојување се зголеми за 27 отсто, пред сè затоа што домаќинствата со пониски и средни приходи почнаа да користат нов систем на стимулации.
Во Франција побарувачката за целосно електрични автомобили порасна за 28 отсто, додека бензинските, дизелските и хибридните автомобили забележаа пад.
Продажбата на нови автомобили во Европа порасна за 1,7 проценти во февруари.
Bloomberg
Новите модели дополнително го поттикнуваат овој тренд. Електричното „рено 5“ (Renault R5), теренецот „шкода елрок“ и „делфин“ на БЈД сè повеќе привлекуваат купувачи, па целосно електричните и плагин хибридните модели во првите два месеца од годината сочинуваа повеќе од една третина од пазарот.
Иако вкупната продажба засега стагнира, новите геополитички ризици може да го нарушат очекуваното закрепнување на пазарот. Војната во Иран, која се шири на Блискиот Исток, внесува дополнителна неизвесност, предупредува аналитичарката на „Блумберг интелиџенс“ (Bloomberg Intelligence), Џилејн Дејвис.
„Неизвесноста предизвикана од војната и забрзувањето на инфлацијата, кое би можело да поттикне зголемување на каматните стапки, може да ја поколеба довербата на потрошувачите и да ја одложи купувачката активност за поскапи производи како автомобили“, вели Дејвис.
Доколку конфликтот потрае, прогнозите брзо се менуваат. „Блумберг интелиџенс“ сега проценува дека продажбата на автомобили во Европа во 2026 година може да падне за четири отсто наместо претходно очекуваниот раст од два отсто.
Како поминаа водечките производители на автомобили во февруари
Bloomberg
Растот на побарувачката за електрични возила отвора простор и за кинеските производители. БЈД и ЖЛ (Zhejiang Leapmotor) го зголемија пазарниот удел на низа европски пазари, а увозните царини на ЕУ засега само благо го забавиле овој тренд. БЈД и САИК (SAIC), сопственик на брендот МГ (MG), во февруари заедно продале повеќе автомобили од „Тесла“, со раст на продажбата од 162 односно 12 отсто. Нивната вкупна продажба достигна 40.314 возила, што претставува околу четири отсто од пазарот.
Европските производители сега го шират изборот на конкурентни електрични модели. „Фолксваген“ (Volkswagen), заедно со брендовите „Шкода“ (Škoda) и „Купра“ (Cupra), годинава планира да понуди нови електрични модели по цена од околу 25.000 евра. „Рено“ (Renault), пак, најавува дека повеќе од половина од 22-те модели што планира да ги лансира во Европа до 2030 година ќе бидат електрични.
.webp){kind=icon}
