Моќен и жеден - го тестиравме „силајон 7“, најлуксузниот модел на БЈД

„Силајон 7“ целосно ја оправдува титулата најлуксузен модел на БЈД (BYD), но неговите извонредни перформанси доаѓаат со доста голема „жед“ за струја, особено кога ќе го притиснете посилно – што со задоволство и ќе го правите.

За каква моќ станува збор доволно говори податокот дека автомобил тежок речиси 2,5 тони од нула до 100 километри на час забрзува за 4,5 секунди. Станува збор за забрзување што буквално ве лепи за седиштето, но во целосна тишина и во премиум амбиент.

Токму тоа е и најсилниот адут на карактерот на „силајон“ – таа комбинација на сурова моќ и елеганција. Ви овозможува на семафор без проблем да оставите зад себе автомобили поскапи и за стотина илјади евра, но и опција мирно и удобно да крстосувате, знаејќи дека во секој момент можете да ја „лансирате“ лаѓата долга 4,8 метри до максимална брзина од 215 км/ч.

Тоа најчесто ќе го правите на рамни делници од патот, бидејќи тежината на „силајон“ и доста меко нагоденото подвозје не се најдобра комбинација за спортско возење по кривулести патишта. Не дека не може да се вози подинамично, но масата на возилото јасно се чувствува. Задниот дел релативно брзо почнува да „бега“, што ги активира безбедносните системи, а ниту чувството на воланот не влева доволно доверба за тестирање на крајните граници на автомобилот.

Сепак, „силајон“ не е дизајниран за таков тип возење, па тоа никако не може да му се земе како мана – напротив. Ваквите големи семејни теренски модели најчесто се возат во градски услови, каде што треба да бидат лесни за управување, удобни и практични. Токму тука водечкиот модел на БЈД навистина блеска.

„Брановиден“ ентериер на „силајон 7“/ Bloomberg Adria

Купе-линијата на големиот теренец не изгледа лошо/Bloomberg Adria

Голем и подвижен

Звучи необично автомобил долг над 4,8 метри и широк над два метра да се снаоѓа добро во градско возење, но пријатно нè изненади уште во моментот кога седнавме зад воланот. Камерите со поглед од 360 степени со одлична резолуција, паркинг-сензорите и добриот агол на вртење (круг на вртење од 11,7 метри) вршат одлична работа и значително ги олеснуваат градските маневри и паркирањето. Благодарение на тоа, многу брзо се стекнува чувство за сигурност и простор, и покрај габаритите на возилото.

Да се разбереме, на тесни паркинг-места и понатаму ќе имате мака, бидејќи веројатно нема да можете доволно да ги отворите вратите за да излезете удобно. Сепак, без поголеми проблеми ќе успеете да се паркирате и на такви места, а ќе добиете и чувство на сигурност додека маневрирате меѓу автомобили, иако просторот е минимален.

„Силајон 7“ во поскапиот пакет на опрема доаѓа со погон на сите четири тркала/ Bloomberg Adria

Што се однесува до удобноста, релативно меко нагоденото подвозје – во комбинација со напреден заден систем и ФСД-амортизери – многу добро ги апсорбира сите нерамнини. Седиштата се комфорни: предните се загреваат и вентилираат, задните „само“ се загреваат, а простор во кабината има и за петмина високи по два метра. Премиум впечатокот особено го нагласува одличната звучна изолација на кабината.

На делници со нов асфалт, во одредени моменти имавме чувство како да сме во вселенски брод, додека во целосна тишина лесно се движевме со доста висока брзина. Шумот од ветерот околу големите ретровизори станува забележлив дури над 110–120 километри на час, но лесно се „покрива“ со звукот на солидниот аудиосистем „динаудио“ (Dynaudio) со 12 звучници.

Воланот, како и седиштата, исто така се загрева, што во овие зимски денови доаѓа навистина добро. Точно е дека седиштата се загреваат малку побавно, но тоа лесно може да се надмине преку апликацијата, со претходно нагодување на условите пред самото влегување во автомобилот.

Дизајнот на ентериерот, како и кај другите модели на БЈД, е инспириран од океанот, но кај „силајон“ таа брановидност на линиите ни „легна“ најдобро. Материјалите се квалитетни и меки, сè дејствува цврсто и визуелно пријатно. Ноќе впечатокот е уште подобар, бидејќи приспособливото амбиентално осветлување создава многу комфорно опкружување.

Амбиенталното осветлување може да се приспособува на безброј начини, дури и во ритамот на музиката/Bloomberg Adria

Покрај четирите УСБ-приклучоци (два напред и два назад), има и безжичен полнач за мобилен телефон со моќност од 50 вати, кој одлично си ја врши работата. Интеграцијата на телефонот преку „Андроид ауто“ (Android Auto) функционира беспрекорно, иако сè уште не е можно користење на екранот во вертикален режим додека е поврзан со телефон.

Штета, бидејќи трикот со ротирање на 15,6-инчниот екран нема многу смисла ако не може да се користи токму за навигација.

За вертикалната положба на екранот не пронајдовме многу реални причини, напротив, но неговото ротирање останува интересен трик со кој лесно се воодушевува публиката/Bloomberg Adria

Пред возачот се наоѓа 10,5-инчен екран со основни информации, кој може делумно да се приспособи според личните преференции, но тоа и нема да ви биде од клучно значење, бидејќи сите важни податоци при возење ќе ги имате на големиот проекциски дисплеј (head-up display), кој ги прикажува информациите директно во видното поле на возачот.

Проекцискиот дисплеј прикажува сè што е потребно – од ограничувањата на брзината, преку адаптивниот систем за одржување на брзината и предупредувањата за мртов агол, па до тековната брзина, за која лесно може да се изгуби чувство. Одлична работа/Bloomberg Adria

Сè на дофат

Во најголем дел, функциите што најчесто ќе ги користите – адаптивниот систем за одржување на брзината, камерите со поглед од 360 степени, како и командите за радио и телефон – е достапно преку копчињата на управувачот. За климата е на располагање гласовен асистент, а за исклучување на звучните предупредувања од системите за асистенција е доволно со еден потег да се спушти „ролетната“ на главниот екран и да се исклучат.

Иако ова треба да се прави секојпат кога ќе седнувате во автомобилот, по неколку возења станува целосна рутина.

Екранот пред возачот од 10,5 инчи нуди јасен преглед на сите поважни информации за возилото/Bloomberg Adria

Физички копчиња има и на средишната конзола, преку кои може да се приспособи интензитетот на забавување при пуштање на педалот за гас, да се избере режим на возење и да се вклучат сите четири трепкачи. Генерално, станува збор за ергономски и практично дизајнирана внатрешност, на која лесно и природно се навикнува.

Простор има повеќе од доволно – и за складирање, и за патници. Напред може да се приспособат висината и длабочината на воланот, како и положбата на седиштата во сите правци, вклучувајќи ја и лумбалната поддршка. Назад, пак, седиштата нудат вистински „директорски“ комфор, со многу простор за нозете, стапалата и главата. Чувството на пространост дополнително го засилува големиот панорамски стаклен покрив со електрична ролетна.

Пространа и луксузна внатрешност на „силајон 7“/Bloomberg Adria

На патниците на задните седишта им се на располагање копчиња за греење на седиштата, два УСБ-Ц приклучоци скриени во фиока на централната конзола, два отвора за клима, како и потпирач за раце со два држача за пијалаци и плитка фиока со капак. Задните прозорци се отвораат целосно, а тука се и два „исофикс“-приклучоци за детски седишта, кои се лесно достапни.

На задните седишта уживаат и возрасните и децата/Bloomberg Adria

Багажникот има зафатнина од 530 литри, која со спуштени задни седишта се зголемува на речиси 1.800 литри. Под предната хауба се наоѓа и т.н. франк со околу 60 литри, доволно голем за неколку поголеми шопинг-ќеси.

Електричното отворање на задниот багажник и хидрауликата на капакот на предниот дел покажуваат дека Кинезите не штедат, за разлика од некои европски производители/ Bloomberg Adria

Голема батерија, но и голема „жед“

„Силајон 7“ има литиум-железно-фосфатна батерија „блејд“, со капацитет од 91,3 киловат-часа, интегрирана во самата структура на возилото, која може да се полни со моќност до 230 киловати (11 киловати на наизменични полначи). На брз полнач постигнавме моќност од околу 200 киловати, додека кога батеријата беше пополнета на околу 40 проценти, брзината на полнење изнесуваше 140 киловати. Во практика, батеријата може да се наполни од 20 до 80 проценти за околу 30 минути.

„Силајон 7“ троши многу, па често ќе ги посетувате полначите, но затоа ќе уживате во возењето/Bloomberg Adria

Што се однесува до потрошувачката, односно досегот, тоа во голема мера ќе зависи од стилот на возење, но дури и со „лесна нога“ на гасот, „силајон“ сака да „пие“. Просечната потрошувачка во моментот кога го презедовме изнесуваше над 32 киловат-часа, во градски услови може да се спушти на 25–26 киловат-часа, но може да порасне и до 45 киловат-часа ако го „газите“ на автопат.

„Силајон 7“ во најголем дел добива само пофалби за својот надворешен изглед Bloomberg Adria

Според ВЛТП-стандардот, односно официјалниот лабораториски начин на мерење на досегот, „силајон 7“ има досег од околу 500 километри. Во реални услови, тој веројатно ќе се движи меѓу 350 и 400 километри, што е сосема пристојно за автомобил со погон на сите четири тркала, кој, со неколку патници и багаж, лесно достигнува маса од три тони и располага со повеќе од 530 коњски сили. 

„Проблемот“ на „силајон“ е што е толку удобен и тивок што создава впечаток дека се вози 40–50 километри на час побавно отколку што покажува брзинометарот. Тоа побрзо ја троши батеријата, но веруваме дека ова е жртва што повеќето возачи ќе ја прифатат со насмевка, бидејќи автомобилот едноставно мами да се притисне папучата за гас.

Нам особено ни одговараше возењето од Далмација кон Загреб по „стариот пат“ (Д1), каде што потрошувачката беше релативно ниска, возењето исклучително пријатно, а понекој камион или побавен возач се претекнуваше за неколку секунди штом ќе се укажеше и најмала можност.

Загревањето и ладењето на седиштата се мал луксуз на кој многу брзо се навикнувате/Bloomberg Adria

Вредност за парите

Довербата што „силајон“ ја влева кај возачот со својата моќ, забрзувања и стабилност може слободно да се спореди со многу поскапи конкуренти од европскиот премиум-сегмент. Цената на моделот што го возевме изнесува 56.500 евра, додека основната верзија со помала батерија и послаб мотор започнува од нешто под 50 илјади евра.

Не станува збор за мала сума, но ако ги погледнеме актуелните цени на новите и половните автомобили кај нас, „силајон 7“ и понатаму изгледа многу конкурентно во својот сегмент – односно нуди навистина добра вредност за вложените пари.

БЈД самоуверено нуди гаранција од шест години за возилото и осум години за батеријата /Bloomberg Adria

Инаку, БЈД неодамна ја прошири гаранцијата за Европа, па таа сега изнесува осум години или 250.000 километри, со најмалку 70 отсто зачуван капацитет на батеријата, што претставува значително подобрување во однос на претходната граница од 200.000 километри. Гаранцијата за возилото трае шест години и покрива 150.000 километри.