Прогноза 2025: Фед ќе продолжи да ги намалува каматите

Во 2025 година, очекуваме континуирано претпазливо и постепено олабавување на монетарната политика на Фед. Проценуваме дека референтната каматна стапка до крајот на годината би можела да падне на ниво од 3,75 отсто, што е за 175 базични поени пониско од највисоката стапка од овој циклус на монетарно затегнување (5,5 отсто). Основната инфлација треба да ослабне, поддржана од геополитичка стабилизација и постепено заладување на пазарот на трудот. Доналд Трамп најавува експанзивна фискална политика, која може дополнително да ги зголеми и онака рекордните буџетски средства што се издвојуваат за камати. Сепак, очекуваме во текот на годината да надвладее разумен пристап и да се смират страстите.

Пазарот на трудот беше под значителен притисок во последните месеци, но видливи се првите знаци на смирување. Благ пораст на невработеноста е видлив во последните месеци и Фед ќе го смета ова како главен показател за понатамошни одлуки. Загриженоста за бројот на вработени кои работат две или повеќе работни места често се гледа како индикатор за прегревање на економијата. Сепак, сегашните податоци покажуваат дека само 5,1 проценти од вработените работат на повеќе работни места, што е во согласност со повеќегодишниот просек. Оттука, според нашата проценка, нема сериозни индиции за прегревање ниту на економијата ниту на пазарот на трудот.

Многу работи ќе зависат од почетокот на мандатот на новоизбраниот претседател. Најважните и најекспонираните одлуки често се носат во првите месеци од мандатот, така што притисокот врз Фед ќе продолжи да биде присутен. Сепак, очекуваме независноста на Фед да остане клучната порака на Џером Пауел. Во 2025 година, Фед веројатно ќе има помало влијание на берзата отколку оваа година.

За пазарот да расте во согласност со очекувањата на аналитичарите (+10 проценти раст на заработката за S&P 500), компаниите ќе треба значително да ги зголемат своите приходи за да ги оправдаат тековните зголемени вреднувања. Сегашниот индикатор цена/заработка(P/E) на индексот S&P 500 е над 27, што е за 12 проценти над петгодишниот просек. Берзата, како и криптовалутите, пукаат од оптимизмот на новоизбраниот претседател, но останува прашањето како ќе се одвиваат работите на геополитички план, но и на домашната фискална политика. Доколку повеќето од работите што ги најави Трамп се применат во пракса, може да се очекува продолжување на растот на берзата, но и раст на приносот на американските обврзници и продолжување на растот на јавниот долг. Како заклучок, 2025 година носи рамнотежа помеѓу приспособувањето на монетарната политика, фискалните предизвици и геополитичките неизвесности, што ќе ги обликува условите за економијата и пазарите.

 

 

Во моментов нема коментари за веста. Биди прв да коментира...

Остави коментар