text size
Сингапур за првпат се искачи на врвот на листата како најскап град во светот за луксузно живеење, бидејќи се бори да биде водечки глобален центар за богатите.
Градот-држава, рангиран на петтото место во 2022 година, скокна пред Шангај и Хонгконг, кои се позиционираа на второто и третото место, според извештајот на швајцарската компанија за менаџирање на богатство „Џулиус Бер“ (Julius Bär Group Ltd).
Како едно од првите места во Азија што повторно ги отворија своите граници за време на пандемијата, атрактивноста на Сингапур за поединци со висока нето-вредност се рефлектира во зголемените цени со кои сега се соочува локалното население. До крајот на 2022 година, Сингапур на својата територија имал околу 1.500 семејни канцеларии, што е двојно повеќе од бројот од претходната година, според извештајот. Тоа е најскапиот град на глобално ниво и во однос на цените на автомобилите.
„Високиот животен стандард и големите барања за локалната инфраструктура значат дека животот овде не е евтин“, се наведува во извештајот објавен во вторникот. „Станбениот имот има исклучително голема побарувачка, а казнено оданочените автомобили и основното здравствено осигурување се за 133 отсто односно за 109 отсто поскапи од глобалниот просек.
Индексот за животниот стил на „Џулиус Бер“ ги рангира 25-те најскапи града во светот преку анализа на станбен имот, автомобили, летови од бизнис-класа, бизнис-школи, вечери за дегустација и други луксузи. Азија остана најскапиот регион за живот на висока нога четврта година по ред.
Њујорк е уште еден голем добитник. Финансиската престолнина на САД се искачи на петтото од 11-то место минатата година, поради зајакнувањето на доларот и закрепнувањето од пандемијата.
Најскапи градови
Сингапур за првпат се искачи на врвот
Bloomberg
За првпат откога се подготвува извештајот, Европа, Блискиот Исток и Африка се најпристапните региони за добро живеење, а европските градови паѓаат на рангирањето.
Дубаи за првпат влезе во топ 10, станувајќи седмиот најскап град, бидејќи Цирих падна на 14-то место. Емиратот е „ѕвезден изведувач“ во годинашниот индекс, а преселувањето на голем број богати поединци влијаеше на цените на имотот и побарувачката, посочуваат од „Џулиус Бер“ .
Истражувањето покажа зголемена побарувачка за патување и забава, бидејќи ограничувањата за пандемијата беа укинати и слободата се врати. Цената на луксузните артикли како виното, со шише „шато лафает ротшилд“ (Château Lafite Rothschild) од 2018 година како репер, и вискито на глобално ниво се зголемија најмногу за 17,2 и 16,2 отсто, соодветно.
„Многу луѓе сè уште се во режим на забава по пандемијата“, рече Марк Метјус, шеф на истражувања за Азија-Пацифик во „Џулиус Бер“, на брифинг за медиумите во вторникот.
Други големи добитници се хотелските апартмани и летовите од бизнис-класа. Сепак, има и некои исклучоци. Цените на велосипедите, кои станаа „енормно скапи“ за време на пандемијата, паднаа за 1,8 отсто.
„Џулиус Бер“ анкетирал поединци со висока нето-вредност со имот на домаќинствата од милион долари или повеќе, од февруари до март 2023 година.
Лондон падна на четвртото место од второто. Брегзит и неговите „последователни превирања“ продолжуваат да ја нарушуваат репутацијата на Британија и градот сега се соочува со силна конкуренција од растечките финансиски центри како Дубаи и Сингапур, според „Џулиус Бер“.
.webp){kind=icon}
