Збришани 797 милијарди долари од пазарната вредност на величествените седум

Волстрит е сè позагрижен поради вложувањата на големите технолошки компании во вештачката интелигенција (ВИ), кои се мерат во стотици милијарди долари, и тоа во момент кога повторното разгорување на војната со Иран ги влошува изгледите за светската економија.

Акциите на компаниите од групата величествени седум во четвртокот го забележаа најголемиот еднодневен пад од распродажбата предизвикана од царините, објавени во април 2025 година. Индексот на оваа група падна за 4,8 проценти, со што беа избришани 797 милијарди долари од нивната пазарна вредност. Индексот S&P 500 падна за 1,2 проценти, додека технолошкиот Nasdaq 100 ослабе за 1,9 проценти.

Повод беа деловните резултати на компаниите „Алфабет“ (Alphabet) и „Тесла“ (Tesla), објавени по затворањето на берзата во средата, кои ги вознемирија инвеститорите и ја доведоа во прашање одржливоста на бумот на вештачката интелигенција, кој веќе над три години го поттикнува растот на акциите. „Алфабет“ ја зголеми проекцијата за капиталните инвестиции за оваа година на дури 205 милијарди долари, додека извршниот директор на „Тесла“, Илон Маск, им порача на инвеститорите дека 2026 година ќе биде „година на огромни капитални инвестиции“, откако производителот на електрични возила пријави значително послаба добивка од очекуваната.

Bloomberg

„Вистинскиот проблем е обемот на трошењето“, изјави Кен Махони, извршен директор на инвестициската компанија МАМ (Mahoney Asset Management). „Никој не знае колкав ќе биде повратот на тие инвестиции.“

Неповолното макроекономско опкружување, вклучувајќи го и растот на цените на нафтата поради заострувањето на конфликтот со Иран, дополнително врши притисок врз технолошките акции, додаде тој.

„Ова е совршена бура“, оцени Махони.

Под притисок се најдоа и акциите на производителите на чипови. Индексот Philadelphia Semiconductor - SOX падна за 0,5 проценти. Тоа е секторот што најмногу профитира од вложувањата во вештачката интелигенција, па индексот од почетокот на годината и понатаму е во плус од повеќе од 70 проценти. Сепак, тргувањето стана значително понестабилно - во последните два месеца само пет трговски денови поминаа без осцилации поголеми од еден процент.

До распродажбата дојде во момент кога инвеститорите стануваат сè повнимателни поради огромните износи што најголемите технолошки компании ги вложуваат во развојот на инфраструктурата за вештачка интелигенција. Индексот на величествените седум сега е за околу 11 проценти под рекордното ниво достигнато кон крајот на мај, со што се избришани околу 2.000 милијарди долари од пазарната вредност.

Резултатите објавени во средата дополнително ги засилија тие стравувања. Иако резултатите на „Алфабет“ се охрабрувачки, со силен раст на работењето во областа на технологиите во облак, предвидените капитални инвестиции беа поголеми од она што го очекуваше пазарот, иако компанијата уште на почетокот на јуни најави дека ќе ги зголеми преку собирање дополнителен капитал. Во вториот квартал „Алфабет“ потроши 45 милијарди долари, поради што за првпат од излегувањето на берзата забележа негативен паричен тек.

„Тоа покажува дека ризикот од инвестирање во акциите на компанијата сега е значително поголем отколку порано, кога ’Алфабет’ беше машина за генерирање кеш“, изјави Џејсон Лемир, директор за инвестиции во компанијата БВП (Bold Wealth Partners).

Во меѓувреме Маск порача дека „Тесла“ треба што е можно побрзо да ги зголемува капиталните инвестиции, но без прекумерно расфрлање со пари.