.webp){kind=icon}
Американските акции паднаа бидејќи инвеститорите ги анализираат коментарите на претставниците на Федералните резерви (ФЕД), кои, главно, останаа цврсти за борбата против инфлацијата. Зголемената загриженост дека Кина може да ги заостри ограничувањата за ковид-19, по низата пријавени смртни случаи, исто така продолжи да ги оптоварува инвеститорите.
Технолошките акции, кои обично се почувствителни на каматните стапки, го повлекоа S&P 500 надолу за 0,4 отсто. Nasdaq 100 го заврши денот со пад од 1,1 отсто, а Dow Jones e послаб за 0,13 отсто. Нафтата излезе од нестабилната сесија главно непроменета, откако Саудиска Арабија го негираше извештајот дека разговара за зголемување на производството на нафта на состанокот на ОПЕК+ следниот месец. Доларот се искачи трет ден, додека инвеститорите бараат рајски прибежишта.
Bloomberg Chartmaker
Инвеститорите внимателно следат што велат претставниците на ФЕД за изгледите за каматните стапки. Додека неколку функционери на централната банка во САД во последните денови ја повторија својата намера да останат немилосрдни додека инфлацијата не биде под контрола, се разликуваат нивните начини на кои сакаат да го постигнат тоа. Во понеделникот, претседателката на Банката на федерални резерви на Сан Франциско, Мери Дејли, рече дека функционерите ќе треба да внимаваат на заостанувањата со кои монетарната политика се пренесува низ економијата, додека дополнително ги зголемуваат стапките. Нејзината колешка од Кливленд, Лорета Местер, рече дека е отворена за забавување на темпото на зголемување на стапките.
Во меѓувреме, претседателот на ФЕД Атланта, Рафаел Бостик, рече дека се залага за забавување на темпото на зголемување на каматните стапки, со не над еден процентен поен повеќе зголемувања, во обид да се обезбеди благо приземјување на економијата. Претседателката на бостонската ФЕД, Сузан Колинс, го повтори својот став дека опциите за декемвриското зголемување на каматната стапка се отворени, вклучувајќи ја и можноста за покачување од 75 базични поени.
„Ова не треба да се смета за нешто ново“, вели Мајкл Контопулос, директор за фиксен приход во „Ричард Бернштајн адвајзорс“ (Richard Bernstein Advisors). „Вистински пресврт е кога ФЕД ќе почне да ги намалува стапките и/или да го паузира квантитативното затегнување. Тоа воопшто не е на повидок“, додава тој.
Трговците оваа недела, исто така, ќе ги следат записниците од најновиот состанок за политиката на ФЕД за дополнителни индиции за потезите на централната банка.
