Вредноста на доларот паѓа, а на европските акции расте

Доларот ослабе во однос на повеќето конкурентни валути од групата 10 најтргувани, јапонските акции се искачија, а европските фјучерси пораснаа во придушеното тргување утрово, при што многу големи центри во Азија беа затворени поради прославите на лунарната Нова година.

Индексот Topix скокна за околу еден отсто, австралиските акции се зголемија, а договорите за Euro Stoxx 50 додадоа 0,4 проценти на својата вредност. Фјучерсите на американските акции беа маргинално пониски по напливот во петокот, кога индексот S&P 500 порасна за првпат во четири дена, а технолошкиот Nasdaq 100 забележа најголема еднодневна добивка од ноември, делумно благодарение на добивките на „Нетфликс“ (Netflix Inc) и на фирмата-мајка на „Гугл“ (Google), „Алфабет“ (Alphabet Inc).

Државните обврзници малку се променија во Азија, додека приносите од нив се зголемија во Австралија и Нов Зеланд, следејќи ги движењата на американскиот должнички пазар во петокот.

Јенот ги промени претходните добивки во однос на зелената банкнота.

„Банката на Јапонија ќе продолжи да биде централна банка што стои сама и се обидува да ја пее својата мелодија. Домашната побарувачка во Јапонија сè уште е неверојатно мека, така што тие се обидуваат да се спротивстават на тој затегнат порив што го видовме од другите развиени, па дури и од економиите во развој“, рече Катрина Ел, економистка во „Мудис аналитикс“ (Moody’s Analytics Inc), во рамките на гостувањето во телевизијата Блумберг.

Пошироко на глобалните пазари и класите на средства, трговците ги следат знаците од американските централни банкари. Гувернерот на Федералните резерви (ФЕД), Кристофер Волер, во петокот рече дека политиката изгледа доста блиску до доволно рестриктивна и тој ја поддржа умереноста во големината на покачувањето на каматните стапки. Претседателот на ФЕД Филаделфија, Патрик Харкер, го повтори своето мислење за дополнителни чекори во зголемувањето на каматните стапки, а шефот на ФЕД Канзас Сити, Естер Џорџ, рече дека економијата може да избегне остар пад.

Благо позитивниот тон беше очигледен и кај криптовалутите, со малку повисоки биткоин и етер, а порасна и златото.

Сепак, како што расте оптимизмот, финансиските услови во САД станаа помалку рестриктивни, што претставува уште еден потенцијален предизвик за напорите за скротување на инфлацијата, што може да им даде на креаторите на политиката причина да ги преиспитаат своите ставови.

Аналитичарката на „ИГ маркетс“ (IG Markets Inc), Хебе Чен, рече дека трговците се обидуваат да ги минимизираат основните недостатоци во изгледите. Во своето гостување на Блумберг ТВ, таа рече дека не очекува ФЕД да ги намали стапките оваа година. Чен, исто така, предупреди дека иако повторното отворање на Кина е позитивно, тоа нема да ги реши сите проблеми со кои се соочува нејзината економија, вклучувајќи ги и проблемите во секторот за недвижности.

Тргувањето на финансиските пазари во азиските часови веројатно ќе биде послабо од вообичаеното, бидејќи главните центри, како Хонгконг, Шангај, Сингапур и Сеул, се затворени поради денешните прослави на лунарната Нова година. Многу регионални пазари ќе останат затворени до средината на неделата, а тргувањето со Кина нема да продолжи до 30 јануари.

Во моментов нема коментари за веста. Биди прв да коментира...

Остави коментар