Инвеститорите на берзите ја намалија нервозата поради банките

Азиските акции пораснаа, исто како и фјучерсите на американските акции, а доларот опадна бидејќи се намалија стравувањата од поширока зараза од банкарските превирања. Мерачот на азиските акции се искачи за околу 0,6 проценти, при што се зголемија референтните индекси во Хонгконг, Австралија и Јапонија. Добија и европските фјучерси.

 

 

Конкретно утрово индексот S&P 500 порасна за 0,2 отсто, но технолошкиот индекс Nasdaq 100 по вчерашниот раст од 0,2 отсто, утрово падна за 0,7 отсто. Во Азија денешната сесија на тргување е различна, па индексите се движат од мал пад до раст од еден отсто.

Трговците претпазливо се насочуваат кон ризичното држење, бидејќи стивнува нервозата во банкарскиот сектор. Финансиските фирми и производителите на енергија го предводеа вчерашниот раст на Волстрит.

Мерачот на вредноста на доларот падна втор ден по ред. Имено, еврото ја зголеми својата вредност во однос на доларот за 0,1 отсто и сега нивниот курс е 1,0813 американски долари за евро. Јенот зајакна откако јапонскиот кабинет одобри користење на некои средства од буџетот за фискалната 2022 година за мерки за ублажување на влијанието на инфлацијата.

Во меѓувреме, трговците со свопови проценуваат околу 50 проценти веројатност дека Федералните резерви (ФЕД) ќе ги подигнат стапките за четвртина поен на следниот собир. Тие продолжуваат да очекуваат нагло олеснување потоа, при што цените сугерираат дека основната стапка ќе се лизне на околу 4,2 проценти во декември. Но со тоа не се согласуваат сите.

„Гледаме како големите централни банки се оддалечуваат од пристапот 'што и да е потребно', ги запираат своите зголемувања и влегуваат во понијансирана фаза, која е помалку за немилосрдна борба против инфлацијата, но сепак фаза каде што не може да ги намалат стапките“, велат стратезите на „Блекрок“ (BlackRock Investment), вклучувајќи ги Веи Ли и Алекс Бразиер.

Некои инвеститори на пазарот остануваат во потрага по сигнали за рецесија што би се случила во текот на оваа година, бидејќи ФЕД и другите централни банки би можеле да бидат принудени да спроведат повисоки зголемувања на стапките за да ја скротат инфлацијата. Главниот стратег на „ЏП Морган“ (JPMorgan), Марко Колановиќ, рече дека првиот квартал најверојатно ќе ја означи највисоката точка за акциите оваа година, препорачувајќи им на инвеститорите да останат дефанзивни.

„Најранливите области ги гледаме како непрофитабилни компании што зависат од постојан проток на акционерски капитал за финансирање на операциите и тесни трансакции што се спроведуваат во последните 10-20 години“, напиша Колановиќ.

Една од најистакнатите „мечки“ на Волстрит, стратегот на „Морган Стенли“, Мајкл Вилсон, исто така е внимателен во однос на акциите, велејќи дека процените за заработката и вреднувањата мора да се намалат.

На криптопазарот расположението на трговците е различно, во зависност од токените. Најголемата криптовалута, биткоинот, падна за 0,2 отсто, на 26.985,8 долари, додека етерот порасна за 0,5 проценти, на 1.716,35 долари.