Тргувањето со акции е нестабилно поради загриженоста за САД и Кина

Фјучерсите на американските акции паднаа во азиската сесија на тргување, но берзанските индекси во тој регион се измешани, бидејќи инвеститорите ги разгледуваат знаците за напредок од разговорите во САД во врска со максималната граница на долгот, со цел да се избегнат проблеми и неисполнување на обврските на државата.

 

 

Индексот S&P 500 утрово е со минимална промена на вредноста, откако во петокот падна за 0,2 отсто. Технолошкиот индекс Nasdaq 100, по петочниот пад од 0,4 проценти, денеска тргувањето го започна со пад од 0,1 отсто. И европскиот индекс Euro Stoxx 50 ја започна неделава со незначителни промени, но азиските индекси покажуваат различни перформанси, од пад од 0,7 проценти до раст од 0,5 отсто.

Доларот ослабе наспроти повеќето негови конкуренти од групата 10 најтргувани валути, додека државните обврзници се малку променети. Сепак, утрово еврото и американскиот долар се тргуваат со незначителен пад и речиси непроменето, односно нивниот курс изнесува 1,0856 долари за евро. Златото, пак, порасна за 0,2 отсто, покачувајќи се на 2.014,47 долари.

Загриженоста за инфлацијата во САД се зголеми во петокот, при што прелиминарното истражување за расположението на Универзитетот во Мичиген покажа дека петгодишните очекувања за добивки од потрошувачките цени скокнаа на 12-годишно ниво.

„Има голем тековен ризик на пазарот. Разговорите за ограничување на долгот сè уште се во тек, а во исто време инфлацијата сè уште е доста покачена. Може да има дополнителни негативни последици кога се во прашање пазарите на акции“, рече Одри Гох, висок стратег за вкрстени средства во „Стандард Чертерд“ (Standard Chartered Wealth Management Group), во рамките на нејзиното гостување на телевизијата „Блумберг“.

Напредокот во разговорите за зголемување на ограничувањето на долгот во САД не го отстрани ризикот од неуспех да се постигне компромис. Министерката за финансии Џенет Јелен рече дека министерството може да остане без пари веќе на 1 јуни или во неделите потоа. Претседателот Џо Бајден и претседателот на Претставничкиот дом, Кевин Мекарти, планираат да се сретнат во текот на утрешниот ден.

Јастребовските коментари од претставници на ФЕД ја зголемија вознемиреноста кај инвеститорите. „Инфлацијата е сè уште превисока“, изјави претседателот на ФЕД-Чикаго, Остан Гулсби, во интервју за ПБС (PBS).

„Не сакате да го спуштите носот на авионот надолу. Значи, ние се обидуваме да балансираме меѓу тоа дали можеме да ја забавиме инфлацијата без да ја испратиме економијата во рецесија“, рече тој.

Коментарите на Гулсби ги следеа оние на гувернерката на ФЕД, Мишел Бауман, која рече дека централната банка најверојатно ќе треба дополнително да ги зголеми каматните стапки доколку не се смират ценовните притисоци.

На другите пазари, криптовалутите растат. Се чини дека инвеститорите го вратија малку интересот за криптопазарот, па биткоинот порасна за 0,9 проценти, искачувајќи се на 27.202,85 долари, а етерот ја зголеми својата вредност за 1,5 отсто и сега чини 1.826,64 долари.

Во моментов нема коментари за веста. Биди прв да коментира...

Остави коментар