„Алибаба“ сурфа на бранот од кинеска вештачка интелигенција

Новите кинески алатки за вештачка интелигенција (ВИ) предизвикаа диво тргување на кинеската берза и го поставија индексот на технолошките компании на повеќегодишен врв.

Компанијата „Алибаба“ (Alibaba) денеска го претстави својот најнов отворен модел со ВИ, КвК (QwQ-32B). Претставувањето значи голем скок во споредба со претходната верзија, која користеше само дел од податоците што ги користи моделот Р1 (R1) на „Дипсик“ (DeepSeek). Неделава компанијата „Манус“ (Manus AI) исто така претстави таканаречен општ агент со ВИ или бот, кој може да извршува задачи, и наведе дека нејзиниот модел е барем во некои области подобар од моделот „дип рисрч“ (DeepResearch) на „Опен ен-ај“ (OpenAI).

Акциите на компанијата „Алибаба“ во Хонгконг се зголемија за 8,2 проценти, што е најмногу во речиси две недели, и така го подигнаа индексот на кинеските технолошки акции за околу пет проценти, што е највисока вредност од 2021 година. Во континентална Кина, акциите на компанијата ФТ (Focus Technology), која продава услуги со агенти со ВИ, се зголемија за 10 проценти. Зголемени се и сродните акции, вклучувајќи го и производителот на софтвер ЦСИ (Client Service International).

Добивките следуваат по пробивот на компанијата „Дипсик“ во областа на вештачката интелигенција на почетокот на годината, што предизвика биковска серија на кинеските акции и потреси на светските пазари. Технолошкиот сектор неделава доби уште еден поттик, откако Кина на националниот народен конгрес најави дека ќе ја поддржи широката употреба на обемни модели со ВИ и развој на интелигентни терминали и производствена опрема од новата генерација.

Во подем е особено компанијата „Алибаба“, која годинава доби околу 135 милијарди долари пазарна вредност. Инвеститорите се заинтересираа за компанијата, која ја основа Џек Ма, бидејќи го стабилизира бизнисот, кој со години беше попречуван од владината репресија. Нејзиниот сè поголем успех во областа на вештачката интелигенција и сè повеќето знаци на поддршка од Пекинг придонесоа за неодамнешниот раст.

„’Алибаба’ има доста позитивни фактори, а најновиот катализатор е нејзиниот отворен модел“, рече Веј-Серн Линг, извршен директор во УБП (Union Bancaire Privee). „Нивниот основен бизнис се подобрува и очигледно ќе има корист од кинеските напори за поттикнување на потрошувачката. Инвеститорите сега ја препознаваат и вредноста што ВИ ќе ја донесе на нивниот бизнис со технологијата во облак“.

По појавата на компанијата „Дипсик“, многу компании претставија модели и услуги за кои тврдат дека се еквивалентни на кинеската стартап компанија или на „Опен еј-ај“, чиј ЧетГПТ е заслужен за започнување на процутот на генеративната ВИ. Многу претставувања на нови модели ги воодушевија инвеститорите и кинеската јавност.

„Имајќи предвид колку евтино изгледаат многу кинески технолошки акции во споредба со нивните американски пандани, гледаме дека на пазарот ќе продолжи повторното вреднување. Возбудата се гледа во тоа што пораснаа дури и некои технолошки имиња од хардверот што претходно не беа многу успешни“, рече Кен Вонг, експерт за азиски акции во ЕИ (Eastspring Investments).

Depositphotos

Најновиот модел на „Алибаба“ треба да се натпреварува со Р1 на „Дипсик“ и o1 на „Опен еј-ај“. Новиот модел се смета за ефикасен со 32 милијарди параметри, бидејќи расте побарувачката за вештачка интелигенција што бара што е можно помалку податоци и користи помалку компјутерски ресурси. Параметрите се делови од моделот со ВИ што учат од податоците и помагаат да се приспособи неговото однесување за попрецизни предвидувања или креирање обмислени резултати.

Компанијата „Алибаба“ се обврза дека во следните три години ќе вложи повеќе од 380 милијарди јуани (52 милијарди долари) во инфраструктура за ВИ, како што се дата-центри, што е голема обврска, која ги изразува амбициите на пионерот на е-трговијата да стане водечки во областа на вештачката интелигенција.

Оваа цел опфаќа еден од најголемите буџети за инфраструктура за ВИ во Кина, што укажува на сè поголемите амбиции на компанијата во оваа област. Сепак, оваа сума се појавува во време кога инвеститорите размислуваат дали големите технолошки компании го преценуваат идниот интерес за услуги со ВИ или капиталот што е потребен за нивно создавање.

Компанијата „Манус“, пак, соопшти дека нејзиниот агент со ВИ бил подобар од моделот „дип рисрч“ на „Опен еј-ај“ во некои показатели користејќи го мерилото ГАИА (GAIA), наменето за оценување на способноста на ВИ-моделите за справување со сценарија во реалниот свет.

Во моментов нема коментари за веста. Биди прв да коментира...

Остави коментар