Нов ризик за Волстрит: европските инвеститори бегаат од американските акции

Американскиот секретар за трговија Хауард Лутник им рече на елитите собрани во Давос дека администрацијата на Трамп смета дека глобализацијата е „неуспешна политика“ која ја оставила Америка зад себе. Ден подоцна, неговиот шеф, претседателот Доналд Трамп, предвиде дека американскиот берзански пазар ќе се удвои од рекордите за кои тој отворено си припишува заслуга.

Меѓу редовите на изјавите на двајцата американски милијардери се чувствува силна тензија: странските инвеститори имаат ненаситен апетит за американски акции во последниве години, играјќи огромна улога во подигањето на референтните индекси до рекордите со кои Трамп сака да се пофали. Европејците, особено, беа страстни купувачи.

И додека Трамп ја намали реториката кон Европа, на Волстрит останува загриженост дека неговата агресивност и потценување на континентот може да ги одврати некои од најголемите купувачи на американски акции од пазарот. Всушност, има знаци дека тоа веќе почнува да се случува.

„Гледаме повеќе клиенти кои сакаат да се диверзифицираат надвор од САД. Го забележавме тој тренд уште во април 2025 година, но оваа недела тој донекаде се забрза,“ рече Винсент Мортиер, главен инвестициски директор во „Амунди“, најголемиот европски управувач со средства.

Тој додаде дека секое раздвојување ќе биде „долг и сложен процес,“ каде клиентите треба да одлучат како ќе се оддалечат од главните индекси и како ќе се заштитат од американскиот долар.

Европските инвеститори поседуваат околу 10,4 трилиони долари во американски акции - и повеќе од половина од таа сума е во сопственост на инвеститори од осумте земји на кои Трамп им се закани со тарифи, потег што придонесе за пад од 2,1 отсто на S&P 500 во вторникот.

За да се стави тоа во контекст,Европејците поседуваат 49 отсто од сите американски акции што се во сопственост на странци — доволно голем дел за да претставува закана за пазарот, напиша Хуго Сте-Мари, портфолио и квантитативен стратег во „Скотија банк“.

Bloomberg

„Ако видиме забрзување на диверзификацијата, тоа би можело со тек на време да тежи врз американските акции, обврзници и доларот,“ рече тој.

Да бидеме јасни, многу е малку веројатно дека Европа би можела, или дури би сакала, заеднички да се ослободи од американските средства. Заканата за Волстрит не доаѓа првенствено, ако воопшто, од владините акции. Но, како што продолжуваат заканите и навредите на Трамп, управувачите со средства од Лондон до Берлин и Мадрид сè повеќе добиваат прашања од клиенти за начини барем да го намалат учеството во американски средства.

Со години, тоа би било губитнички потег, бидејќи американските акции убедливо ги надминуваа пазарите на развиените земји. Но тоа се промени од инаугурацијата на Трамп, бидејќи доларот ослабе, а европските влади го зголемија трошењето. Минатата година, Stoxx 600 скокна за 32 отсто, јапонскиот Topix доби 23 отсто, а јужнокорејскиот Kospi се искачи за 80 отсто - додека американскиот индекс порасна за 16 отсто. Канадскиот S&P/TSX Composite се зголеми за 28 отсто, надминувајќи го S&P 500 со најширока маргина во последниве 20 години — и тоа пред да се земе предвид ефектот на валутата.

„Ако бев Европеец, ќе седев и ќе си кажев: ‘имаме изложеност на САД, а има повеќе можности на друго место,’“ рече Мајкл О’Рурк, главен пазарен стратег во „Џонс трејдинг сервисис“.

Продажбата би означила голема промена за европските инвеститори, чии американски средства пораснаа за 91отсто, или за 4,9 трилиони долари, само во последните три години, одразувајќи комбинација од купување и раст на цените, според податоците на Федералните резерви објавени на 9 јануари и ажурирани до септември. Понови податоци сè уште доцнат поради затворањето на американската влада.

Пензискиот фонд СИСА (SISA) на Гренланд, кој управува со околу 7 милијарди дански круни (1,1 милијарди долари), има приближно 50 отсто изложеност кон САД, главно во акции. Управниот одбор дебатира за можноста за повлекување. Досега имаше малку продажба на акции, иако пензиските фондови, вклучувајќи го и данскиот „Академикерпенсион“ (AkademikerPension), се повлекуваат од американските државни обврзници.

Верен на својот борбен стил, Трамп предупреди дека координирани или масовни повлекувања би заслужиле „голема одмазда,“ држејќи го стапот на финансиска казна цврсто во рака. За некои во Европа, заканите станаа премногу.

„По пет години значителни приливи во американски средства — и со оглед на слабеењето на доларот и растечката инструментализација на американската валута — диверзификацијата сега е во преден план за повеќето институционални инвеститори,“ рече Рафаел Туин, раководител на стратегии за капитални пазари во париската „Тикехау“ (Tikehau Capital SCA), која управува со над 50 милијарди евра. Тој додаде дека темата често се појавува кај клиенти во Европа и Азија.

Bloomberg

„Како што инвеститорите се пренасочуваат кон нов циклус, веруваме дека алокациите во европски средства би можеле да се забрзаат оваа година,“ рече тој.

Иако заканата за американските акции од евентуален европски бојкот засега е ограничена, таа се додава на листата ризици за пазар кој тргува на историски високи вреднувања.

„Ова навистина е средина каде што не сакате целосно да бидете изложени на американски акции или средства, особено не на доларот,“ рече Матијо Рашетер, раководител на стратегија за акции во „Џулиус беар“, која управува со 520 милијарди швајцарски франци.

Постои преседан за продажба на американски средства како протест против заканите на Трамп. Минатата година, Канаѓаните побараа нивните пензиски фондови да ги намалат вложувањата во американски акции откако американскиот претседател рече дека ќе употреби „економска сила“ за да ја направи земјата 51-та држава. На Давос, премиерот Марк Карни рече дека земјите кои порано се потпираа на финансиска интеграција со САД треба да преиспитаат, бидејќи Трамп ја претвори таа меѓузависност во оружје.

„Ако го прашате економист што велат учебниците за тарифите, тоа е дека тие би биле тешки за земјата-извозник, но она што го гледаме сега, барем на финансиските пазари, е некаков спротивен ефект,“ рече Себастиен Пејџ, главен инвестициски директор во „Т/ Ров прајс“, која управува со речиси 1,8 трилиони долари. „Тоа мотивира домашни инвестиции и мотивира диверзификација на трговските партнери.“

Досега, дневните податоци за ETФ приливи покажуваат дека има „малку промени“ во побарувачката на странските инвеститори за американски фондови со акции, напишаа стратезите на „ЏП Морган“ предводени од Николаос Панигиртзоглу во средата.

Тоа би можело да се промени во наредните месеци.

„Не може да се исклучи на подолг рок дека тежината на САД ќе биде прилагодена,“ рече Бенџамин Мелман, главен инвестициски директор во „Едмонд де Ротшилд асет менаџмент“ (Edmond de Rothschild Asset Management) која управува со средства вредни 184 милијарди швајцарски франци (234 милијарди долари).

Проблемот произлегува од тоа што САД очигледно се откажуваат од меѓународниот поредок заснован на правила што претходно го поддржуваа, што значи дека инвеститорите не можат да му веруваат на американскиот долар или на вложувањата во иднина, рече Ларс Кристиансен, извршен директор и раководител на анализа во „Паис“, финансиска консултантска фирма.

„Не станува збор за Европа да му се спротивстави на САД,“ рече тој во објава на X. „Станува збор за да бидеме разумни со нашите инвестиции — за намалување на ризиците.“