Трговците се подготвени за доктрината „Донро“ што ќе ги поттикне пазарите во 2026 година

Инвеститорите се подготвуваат за година на зголемен геополитички ризик бидејќи Белата куќа се потпира на доктрината „Донро“ – оживувањето од страна на американскиот претседател Доналд Трамп на двестегодишната надворешна политика што има цел да проектира американска доминација на западната хемисфера и евентуално пошироко.

Не е лесно да се предвиди како промената на политиките на Трамп може да се одрази низ средствата: неговите потези честопати се непредвидливи и може да влијаат на низа пазари, од цените на енергијата до увозот на чипови што ја напојуваат индустријата за вештачка интелигенција (ВИ). Во стратегијата за национална безбедност објавена минатиот месец администрацијата на Трамп ја искажа својата јасна намера да ја надгради доктрината на поранешниот претседател Џејмс Монро.

 

„Вреди да се направи чекор назад и да се погледнат долгорочните импликации бидејќи мислам дека постои стратегија, наречена обликување на портфолио, за тоа што се случува од геополитичка перспектива“, рече Сем Рајнс, макростратег во „Висдм три“ (WisdomTree).

Bloomberg Mercury

 

Досега соборувањето на Николас Мадуро од Венецуела се покажа како само мал поттик во и онака рекордниот раст на американските акции, зајакнувајќи ја идејата дека поширокиот пазар на акции ретко се задржува долго на геополитичките ризици. Сепак, под површината не недостигаат вкрстени струи: повиците за зголемени воени трошоци предизвикаа пораст на акциите во одбраната, додека инвеститорите се фокусираат на потенцијалните американски потези во повеќе региони, вклучувајќи ги Гренланд, Иран и Куба - и размислуваат како би можеле да одговорат Кина и Русија.

Во меѓувреме, цените на нафтата вчера скокнаа откако Трамп рече дека Иран ќе „плати голема цена“ за убивањето демонстранти, зајакнувајќи ги аргументите за тие што веруваат дека во 2026 година ќе се интензивираат конфликтите низ целиот свет.

Еве еден краток преглед на тоа како геополитичкиот ризик би можел да ги помести пазарите во претстојните месеци.

Технологија

Технолошкиот сектор, кој има најголема тежина на американскиот пазар, веројатно ќе ги доживее најголемите нарушувања ако кинескиот претседател Шји Џјинпинг одговори на хегемонијата на САД во западната хемисфера со заземање поагресивен став кон Тајван.

„Енвидија“ (Nvidia Corp.), највредната акција во САД, во Тајван (глобален центар за производство на чипови) остварува 16 проценти од своите приходи, а таму наоѓа и 15 отсто од своите доставувачи. Покрај тоа, групата S&P 500 Semiconductors & Semiconductor Equipment сега има тежина од 14 проценти во поширокиот индекс.

„Ако Тајван биде исклучен одеднаш од синџирот, тоа би имало огромни, огромни негативни импликации врз нашата берза“, рече Марк Малек, главен инвестициски директор во „Муриел Сиберт“ (Muriel Siebert & Co).

Bloomberg Mercury

 

Тензиите во врска со Тајван би го насочиле фокусот кон „Тајван семикондактор“ (Taiwan Semiconductor Manufacturing Co.), компанија меѓу чии клиенти се многу од најголемите технолошки компании во САД, вклучувајќи ги „Епл“ (Apple Inc.), „Енвидија“, „Бродком“ (Broadcom Inc.) и „Амазон“ (Amazon.com Inc).

Од друга страна, компаниите што имаат договори со Пентагон, како што е „Палантир технолоџис“ (Palantir Technologies Inc.), би можеле да ги соберат плодовите од зголемениот геополитички ризик, рече Малек.

Инвеститорите исто така купуваат акции на американскиот производител на чипови „Интел“ (Intel Corp.), кој би можело да има корист ако се нарушат глобалните синџири на снабдување. Акциите оваа година пораснаа за повеќе од 28 проценти.

Одбрана

Акциите во одбранбената индустрија, кои неодамна беа погодени од низата објави од Трамп на социјалните мрежи, може да понудат релативна заштита на долг рок.

Изгледите за свет што сега е повеќе склон кон конфликти, заедно со предложеното зголемување на воените трошоци на САД, веќе му обезбедија на секторот силен почеток во 2026 година: меѓу победниците се акциите на изведувачите „Л3 Харис технолоџис“ (L3Harris Technologies Inc.) и „Хантингтон ингалс индустрис“ (Huntington Ingalls Industries Inc.), кои од почетокот на годината напредуваа за 16 и 21 отсто, соодветно.

„Ако ситуацијата биде помалку стабилна подолг временски период, тогаш очигледно компаниите во одбраната се стабилна ротација наспроти тој вид нестабилност“, рече Брајан Малбери, менаџер за портфолио на клиенти во „Закс инвестмент менаџмент“ (Zacks Investment Management Inc.), кој ги сака акциите на поголемите одбранбени имиња како што се „Рејтион“ (Raytheon) и „Џенерал дајнамикс“ (General Dynamics).

Bloomberg Mercury

 

И други области од секторот нудат можности доколку тензиите се зголемат, смета Џозеф Шапошник, менаџер за портфолио во „Рејнвотер еквити“ (Rainwater Equity LLC.), која поседува акции на „Лоар холдингс“ (Loar Holdings Inc.) и „Трансдим“ (TransDigm Group Inc).

„Ако се земе предвид администрацијата на Трамп, многу е можно некои од овие бизниси да се сметаат како акции за раст во следните неколку години“, рече тој.

Енергија

Цените на суровата нафта вчера скокнаа четврта сесија по ред откако предупредувањето на Трамп до Иран го обнови фокусот на инвеститорите врз можните последици од воената акција на САД против земјата богата со нафта.

Сепак, скокот на цените не влијаеше многу за да се променат ставовите на скептиците за еден од централните делови од доктрината „Донро“: повикот компаниите да дупчат во Венецуела. „Ексон“ (Exxon Mobil Corp.) го предизвика гневот на Трамп откако минатата недела ја нарече јужноамериканската земја „неинвестициска“.

Неодамнешните добивки на акциите на „Халибартон“ (Halliburton Co), „Бејкер хјуџис“ (Baker Hughes Co.) и СЛБ (SLB Ltd.) можеби беа претерана реакција, која би можела да се промени, бидејќи инвеститорите го разгледуваат времето што може да биде потребно за да се отвори нафтениот сектор на Венецуела, рече Мет Малеј, главен пазарен стратег во „Милер табак“ (Miller Tabak + Co).

Всушност, најголеми добитници во енергетскиот сектор од отстранувањето на Мадуро од страна на Трамп може да бидат рафинериите, кои обично имаат подобри резултати кога цените се ниски.

„Рафинериите на брегот на Мексиканскиот Залив ќе бидат најголем корисник поради зголемената понуда на тешка сурова нафта на пазарот“, рече Сајмон Вонг, менаџер на портфолио во „Габели фандс“ (Gabelli Funds).

Bloomberg Mercury

 

Суровини

Иако вниманието на инвеститорите е концентрирано на потенцијалот за енергетски акции, секторот за метали и рударство исто така забележа остри добивки.

Акциите на „Критикал металс“ (Critical Metals Corp.), компанија што  истражува ретки минерали и литиум со имоти во Гренланд, минатата недела скокнаа за 84 проценти, бидејќи претставниците на администрацијата на Трамп отворено разговараа за можноста за користење на американската војска за САД да го преземат северноатлантскиот остров од Данска. Гренланд е богат со критични минерали.

Акциите и на други рудари во тој потсектор, вклучувајќи ги „МП матиријалс“ (MP Materials Corp.) и „УСА реар ерт“ (USA Rare Earth Inc.), исто така скокнаа откако претставниците на Трамп и европските лидери разменија критики, а данските претставници предупредија за можен крај на НАТО.

Bloomberg Mercury

 

Сепак, вложувањето во таквите акции доаѓа и со свој пад. Растот на акциите на ретки земни метали можеби е поттикнат од очекувањата на инвеститорите од Кина (лута поради недостигот од пристап до венецуелска нафта) да возврати со воведување ограничувања на металите, смета Стив Сосник, главен стратег во „Интерактив брокерс“ (Interactive Brokers).

Мејли од „Милер табак“ рече дека цените на златото и среброто, кои достигнуваат нови максимуми по апсењето на Мадуро, се доказ дека инвеститорите бараат заштита додека очекуваат повеќе геополитички превирања.