Распродажба на берзите – паѓаат акциите, златото, среброто, нафтата, бакарот

Азиските акции го претрпеа најголемиот дводневен пад од почетокот на април, предводени од технолошките компании, поради загриженост за процените и големите капитални вложувања поврзани со вештачка интелигенција. Фјучерсите укажуваат на понатамошни загуби во Европа и САД.

Продолжува падот на цените на златото и среброто, при што златото се намали за речиси 10 отсто, а среброто падна до 16 отсто. Основните метали исто така беа под притисок, бакарот се намали за повеќе од 5 отсто на Лондонската берза на метали, а неколку фјучерси на метали во Кина ги достигнаа дневните лимити за пад.

Авeрзијата кон ризикот се прелеа и во криптовалутите, привремено туркајќи го биткоинот под 75.000 долари. Во меѓувреме, индексот Bloomberg Dollar Spot ги додаде добивките од петокот, бидејќи инвеститорите бараа релативна сигурност.

Нафтата нагло падна откако го забележа својот најголем месечен раст од 2022 година, при што геополитичките ризични премии се намалија откако претседателот Доналд Трамп изјави дека Вашингтон разговара со Иран.

Брент нафтата се тргуваше околу 66 долари за барел по зголемување од 16 отсто минатиот месец, додека ВТИ остана под 62 долари.

Според аналитичарите, причината за силниот пад  на берзанските цени лежи во загриженоста за потенцијално построга политика на Федералните резерви, како и пренатрупаните позиции во пазарите на стоки, што го засили поширокото повлекување од ризик.

Хебе Чен, виш пазарен аналитичар во „Вантиџ глобал прајм“ (Vantage Global Prime), очекува уште поголема болка на краток рок. Таа вели: „Ова е момент на ‘продај-сѐ’, со загуби кои се продлабочуваат додека инвеститорите се соочуваат со структурна ранливост што долго време беше прикриена во фазата ‘купи-било-штo’.“

На краток рок, додава таа, „пазарите повеќе личат на отворена рана отколку на чист прекин.“

Европските акции се очекува да отворат пониско, со фјучерси и индикации што укажуваат на загуби. Фјучерсите на FTSE 100 се намалени за околу 0,7 отсто, додека Euro Stoxx 50 фјучерсите паднаа приближно 1 отсто. Металите остануваат доминантен фактор за пад, притискајќи ги рудниците како „Гленкор“  кој бележи пад од над 5 отсто на пред отворањето на европскиот пазар.