Златото и среброто паѓаат, доларот расте: Играта ја води Фед

Златото и среброто денеска поевтинија значително, смирувајќи го претходниот рекорден раст, а падот е резултат на растот на доларот, што, пак, следуваше по извештајот дека администрацијата на Доналд Трамп се подготвува да го номинира Кевин Вoрш за претседател на Федералните резерви.

Златото падна дури за 5,9 отсто, продолжувајќи ги дивите осцилации што го прекинаа рекордниот раст од претходно. Вредноста на доларот се зголеми дури за 0,5 проценти, правејќи ги скапоцените метали поскапи за повеќето купувачи. Среброто и платината паднаа за повеќе од 10 отсто.

Се очекува претседателот Доналд Трамп да го номинира Вoрш за претседател на Федералните резерви, објави „Блумберг њуз“. Поранешниот гувернер на Федералните резерви има долгогодишна репутација на јастреб на инфлацијата, но се усогласи со претседателот во последните месеци јавно застапувајќи се за пониски каматни стапки. Трамп рече дека ќе го објави својот кандидат в петок наутро по американско време.

Потегот на златото „ја потврдува предупредувачката приказна за брзо зголемување, брзо намалување“, рече Кристофер Вонг, стратег во „Оверси чајнис бенкинг“ (Oversea-Chinese Banking Corp). Иако извештаите за номинацијата на Ворш беа причина, корекцијата беше задоцнета, рече тој. „Тоа е како еден од оние изговори што пазарите ги чекаат за да ги одмотаат тие параболични движења.“

Со толку голем скок на цените на златото и среброто оваа година, некои технички индикатори покажаа предупредувачки знаци. Еден од нив е индексот на релативна сила, кој во последните недели сигнализираше дека двата метала можеби се прекупени и им треба корекција. RSI на златото неодамна достигна 90, највисоко ниво за овој благороден метал во последните децении.

Дури и по падот, златото сè уште е во пораст за околу 17 отсто во јануари, приближувајќи се до својот најголем месечен раст од 1980 година. Скокот на среброто беше импресивен, при што белиот метал порасна за 43 проценти досега оваа година.

Пресвртот на глобалниот поредок од страна на администрацијата на Трамп - вклучувајќи го и апсењето на лидерот на Венецуела, заедно со заканите за анексија на Гренланд и воведување царини против сојузниците - беше главен двигател. Неодамна Трамп предупредуваше за можен напад врз Иран и велеше дека ќе воведе царини за сите земји што ја снабдуваат Куба со нафта.

Во меѓувреме ризикот од уште едно затворање на американската влада беше избегнат откако Трамп и демократите во Сенатот постигнаа привремен договор. Белата куќа продолжува да преговара со демократите за поставување нови ограничувања на имиграциските рации што предизвикаа национален протест.

Златото падна за 5,9 отсто, на 5.059,36 долари за унца, од 9:10 часот наутро во Лондон. Среброто падна за 11 проценти, на 102,89 долари. Индексот на доларот на „Блумберг“ порасна за 0,3 проценти. Платината и паладиумот исто така паднаа.