Златото надмина 5.000 долари - глобалните превирања ја поттикнуваат побарувачката

Златото за првпат надмина 5.000 долари за унца, продолжувајќи со вртоглавото поскапување поттикнато од прекројувањето на меѓународните односи од страна на американскиот претседател Доналд Трамп и бегството на инвеститорите од државните обврзници и валути.

Благородниот метал порасна за 2,1 отсто, до речиси 5.100 долари, бидејќи слабеењето на доларот ја зајакна побарувачката. Вредноста на американската валута падна за речиси 2 отсто во шест сесии, а шпекулациите дека САД би можеле да ѝ помогнат на Јапонија во напорите да го зајакне јенот ја засилија загриженоста околу независноста на Федералните резерви и непредвидливата политика на Трамп.

Среброто исто така скокна на рекордно ниво, над 109 долари за унца, бележејќи раст трет ден по ред.

Златото го надмина S&P 500 со принос од над 1.600 отсто овој век
Последниот раст на благородниот метал е поттикнат од купувањата на централните банки и побарувачката за сигурни вложувања

Bloomberg

Драматичниот раст на златото, чија цена е повеќе од двојно зголемена во последните две години, уште еднаш ја потврдува неговата историска улога како мерка за стравот на пазарите. По најсилниот годишен раст од 1979 година наваму, цената досега годинава порасна за повеќе од 17 отсто, во голема мера поради таканаречената трговија на девалвација, при што инвеститорите се повлекуваат од валутите и американските државни обврзници.

Масовната распродажба на јапонскиот пазар на обврзници минатата недела е најнов пример за тоа како инвеститорите го одбиваат високото фискално трошење. Во последните недели потезите на администрацијата на Трамп, односно нападите врз Федералните резерви, заканите за заземање на Гренланд и воената интервенција во Венецуела, дополнително ги вознемирија пазарите. За инвеститорите што се обидуваат да се движат низ оваа неизвесност, привлечноста на златото како сигурно засолниште ретко кога била поголема.

„Златото е спротивност на довербата“, изјави Макс Белмонт, портфолио-менаџер во „Фрст игл“ (First Eagle Investment Management). „Тоа е заштита од неочекувани бранови на инфлација, ненадејни падови на пазарот и засилување на геополитичките ризици.“

Златото ги надмина американските државни обврзници во девизните резерви на централните банки

Bloomberg

За време на викендот, Трамп ѝ се закани на Канада со царини од 100 отсто на целиот нејзин извоз во САД, доколку Отава склучи трговски договор со Кина, со што дополнително ги заостри билатералните тензии. Во меѓувреме политичката неизвесност во САД останува висока, откако лидерот на демократското мнозинство во Сенатот, Чак Шумер, вети дека ќе го блокира огромниот пакет за јавна потрошувачка доколку републиканците не го отстранат финансирањето за Министерството за внатрешна безбедност што го зголемува ризикот од делумно затворање на владата.

Растечкиот јавен долг во развиените економии стана уште еден клучен столб на растот на златото. Некои долгорочни инвеститори, убедени дека инфлацијата ќе стане единствениот пат кон државна солвентност, вложуваат во злато како начин за зачувување на куповната моќ.

„Луѓето се многу повеќе загрижени за долгорочната траекторија на долгот во последните три години“, изјави Џон Рид, главен стратег во Светскиот совет за злато.

„Најмногу ги слушам аргументите за девалвација и долг кај семејните инвестициски фондови. Тие размислуваат за заштита на богатството за идните генерации, а не за краткорочен период.“

Оваа трговија на девалвација го достигна својот врв кон крајот на 2025 година, кога истакнати инвеститори како извршниот директор на „Ситадел“ (Citadel), Кен Грифин, и основачот на „Бриџвотер“ (Bridgewater), Реј Далио, укажаа на растот на златото како предупредувачки сигнал.

Инвеститорите сега го чекаат изборот на Трамп за следниот претседател на Федералните резерви, откако американскиот претседател изјави дека ги завршил интервјуата со кандидатите и повтори дека веќе има некого на ум за функцијата. Поумерен претседател би ги засилил обложувањата за дополнителни намалувања на каматните стапки годинава, што е позитивно за златото, по трите последователни намалувања.

„Многу од сегашните геополитички неизвесности предизвикани од Трамп веројатно нема да исчезнат наскоро“, изјави Васу Менон, извршен директор за инвестициска стратегија во ОЦБ (Oversea-Chinese Banking Corp Ltd.). Тоа значи дека „златото би можело да остане во игра во наредните месеци, па дури и години, иако инвеститорите мора да се подготват за повремени корекции по силните добивки во изминатите 12 месеци“.

Привлечноста на златото се гледа и во податоците за позиционирањето. Хеџ-фондовите и другите големи шпекуланти ги зголемија нето-долгите позиции во металот на највисоко ниво во последните 16 недели, за неделата што заврши на 20 јануари, покажуваат податоците на американската влада.

Растот на среброто беше поддржан од силната инвестициска побарувачка, вклучувајќи и од мали инвеститори, од Шангај до Истанбул. Во исто време инвеститорите чекаат разјаснување околу можните американски царини.

Златото се тргуваше за 1,5 отсто повисоко, на 5.063,82 долари за унца, во 13:09 часот во Сингапур. Среброто порасна за 4,5 отсто, на 107,78 долари. Платината скокна на рекордно ниво, а порасна и паладиумот. Индексот Bloomberg Dollar Spot падна за 0,4 отсто, по загубата од 1,6 отсто минатата недела.