Ако се обложите дека луѓето нема да слетаат на Месечината следната година, веројатно ќе заработите повеќе пари отколку ако инвестирате во државни обврзници. И овој навидум бизарен заклучок не е направен на шега, туку со гледање на приносите што можат да се остварат од облозите на пазарите за предвидување.
Платформи како „Полимаркет“ не тргуваат со акции или обврзници, туку со исходите од настаните. Луѓето се обложуваат едни против други за исходот од настани како што се дали голем метеорит ќе ја погоди Земјата пред 2030 година, дали Тејлор Свифт ќе го спомене својот свршеник на нејзиниот следен албум, кој ќе освои Оскар или кој ќе ги освои следните избори во САД.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Среброто го победи златото во 2025
Среброто забележа голема победа над златото кога станува збор за растот на цените во текот на 2025 година. Златото се искачи над 70 проценти, што е најсилниот годишен резултат од 1979 година, а среброто го продолжи својот тренд на пораст со одредени флуктуации и се зголеми за над 140 проценти во однос на претходната година.
Се предвидува дека златото ќе достигне 5.000 американски долари до крајот на 2026 година, поттикнато од купувањето од страна на централните банки и диверзификацијата на инвеститорите, прогнозираат нашите аналитичари.
Кога станува збор за среброто, тие велат дека неговата двојна функција, како индустриски метал и како заштита од инфлација, ја зацврстува биковската поставеност за годинава.
Бафет си заминува, принципите остануваат
Бидејќи познатиот инвеститор формално се пензионира годинава, оставајќи зад себе не само една од најуспешните инвестициски кариери во историјата туку и филозофија што го обликуваше начинот на кој светот размислува за парите, ризикот и трпението со децении - важно е да се запомнат неговите највредни совети што вивнаа многу инвеститори кон самиот врв на берзата.
Во ерата на алгоритамско тргување, криптоманија и брзи добивки, неговите пет клучни совети изгледаат старомодно - но токму затоа тие сè уште функционираат...
Нафтоводот Солун-Скопје во функција по пауза од 13 години
Нафтоводот Солун-Скопје беше пуштен во употреба на Нова Година, соопшти извршниот директор на „Хеленик Енерџи“, Андреас Шиамисис, говорејќи на настан на компанијата во понеделникот. Како што пренесува терминалот на „Блумберг“, тој додаде дека првиот товар е веќе испорачан, а вториот ќе следи во рок од неколку дена. Според него, работењето на нафтоводот го олеснува извозот не само во нашата земја, туку и на соседните пазари како што се Косово, Јужна Србија и Бугарија, зајакнувајќи го геополитичкиот отпечаток на земјата во регионот.
Исто така, го ослободува Солун од значителен сообраќајен метеж и еколошки товар предизвикан од движењето на камионите за гориво што се користеа за транспорт на гориво во последните 13 години - период во кој работењето на нафтоводот беше суспендирано.
Македонија бара инвеститори за нова еврообврзница
Македонија преку Министерството за финансии на 12 јануари ги задолжила Банката на Америка (BofA Securities), „Ерсте Груп“ (Erste Group), „ЏП Морган“ (J.P. Morgan) и „Стандард Чартерд Банка“ (Standard Chartered Bank) да организираат серија повици за инвеститори со фиксен приход, а со цел да се обезбедат пари за ново задолжување на државата преку издавање обврзници.
Според информацијата објавена на терминалот на „Блумберг“, македонската Влада ќе се обиде да се задолжи преку понуда на обврзници со референтна фиксна каматна стапка деноминирани во евра со рок на отплата на четири и на осум години. Понудата е за котирање на главниот пазар на Лондонската берза, а ќе се реализира во зависност од пазарните услови.
Цените на становите галопираат - 25 отсто раст
Не забавува растот на цените на становите. Во последниот квартал од годината, според податоците на Народната банка, цените на недвижностите се зголемиле за 25 отсто на годишно ниво. Во однос на претходниот квартал растот изнесува 3,2 отсто.
Минатата година беше рекордна кога станува збор за растот на цените на недвижностите. Стапките на раст беа најголеми во последните 25 години.
Најскапите станови се продаваат во скопски Центар. Според податоците на Агенцијата за катастар на недвижности за третиот квартал од минатата година, најскапиот стан во оваа општина достигнал цена од над 3.000 евра за метар квадратен (189.231 денари). Купувачот за 91 метар квадратен платил 280.000 евра.
.webp){kind=icon}
