Послаб оптимизам за златото, „Дојче банка“ ги намали прогнозите за цената за дури 22 отсто

„Дојче банка“ ги намали прогнозите за цената на златото за дури 22 отсто, бидејќи инвеститорите стануваат повнимателни кон изгледите за монетарната политика во САД, а инвестициската побарувачка за благородниот метал слабее.

Банката сега очекува златото во третиот квартал да достигне 4.300 долари за унца, што е за повеќе од една петтина под претходната прогноза, а во последниот квартал од годината 4.800 долари за унца, што претставува намалување од 17 отсто, напиша аналитичарот Мајкл Хсуе во белешка до клиентите. И покрај ревизијата, и двете прогнози сè уште подразбираат раст во однос на сегашното ниво од околу 4.140 долари за унца.

Помалку оптимистичкиот став на „Дојче банка“ следи по сличниот потег на „Голдман сакс“, која минатата недела ја намали својата прогноза за крајот на годината за 500 долари, на 4.900 долари за унца, откако заклучи дека американската централна банка нема да ги намали каматните стапки оваа година.

Златото досега во кварталот загуби повеќе од 11 отсто од вредноста. Војната на Блискиот Исток првично ги зголеми цените на енергенсите, што ги засили очекувањата за построга монетарна политика. На последниот состанок, претставниците на Фед ги задржаа каматните стапки непроменети, но сигнализираа поголема поддршка за идни зголемувања. Во меѓувреме, новиот претседател Кевин Ворш вети враќање на ценовната стабилност.

„Репозиционирањето на очекувањата за Фед, заедно со отпорните макроекономски показатели во САД, одигра главна улога во падот на златото“, напиша Хсуе.

Според банката, прогнозата од 4.800 долари за четвртиот квартал се темели на очекувањето дека Фед ќе ги задржи стапките непроменети. Доколку, пак, следуваат три до четири зголемувања на каматите, цената на златото би можела да се спушти до околу 3.800 долари за унца.

Хсуе посочи дека континуираните одливи од фондовите поддржани со злато покажуваат дека вообичаениот извор на поддршка за металот моментално недостасува. Дополнително, попустот на цената на златото во Кина во однос на котациите на Комекс укажува дека увозот нема да биде двигател на побарувачката.

Единствената посилна поддршка за златото во моментов доаѓа од централните банки.

„Единствениот столб што останува цврст е побарувачката од централните банки и очекуваме тоа да продолжи уште долго време“, наведе Хсуе.