.webp){kind=icon}
Сем Банкмен-Фрид во средата им порачал на инвеститорите во ФТХ (FTX.com) дека без финансиска инјекција, компанијата ќе мора да поднесе барање за стечај, според извор директно запознаен со ситуацијата.
Во повикот пред „Бајненс“ (Binance) да го преомени курсот и да се откаже од својата понуда за преземање, Банкмен-Фрид ги информирал инвеститорите дека неговата криптоберза се соочува со недостиг од осум милијарди долари и дека се потребни четири милијарди долари за да остане солвентна, посочува споменатиот извор, барајќи да остане анонимен. FTX се обидува да собере средства за спасување во форма на долг, капитал или комбинација од двете, додава изворот.
Прочитајте повеќе: Криптовалутите тонат откако „Бајненс“ го потресе пазарот
„Се за***в“, им рекол Банкмен-Фрид на инвеститорите за време на повикот, според изворите. Тој посочил дека би бил „неверојатно, неверојатно благодарен“ доколку инвеститорите можат да помогнат.
Претставник на FTX одбил да коментира за ситуацијата.
Признавањето на сериозните проблеми на неговата фирма и ограничените опции претставува зачудувачки пресврт за некогашниот вундеркинд од крипто-индустријата, кој некогаш вредеше 26 милијарди долари и беше споредуван со Џон Пиерпонт Морган (Џ.П. Морган). Исто така, ја нагласува неизвесноста која виси над FTX, нејзините клиенти и пазарот на криптовалути.
Додека берзата се колеба, на конец е судбината не само на нејзините инвеститори и заемодавачи, туку и на оние кои не беа во можност да си ги повратат средствата откако некои повлекувања беа стопирани претходно неделава. Неуспехот на крипто-фирмите „Целзиус“ (Celsius) и „Војаџер“ (Voyager) доведе до тоа средства на клиенти во износ од милијарди да останат врзани во стечајна постапка.
FTX има истакната листа на финансиска поддршка која вклучува компании како „Секвоја капитал“ (Sequoia Capital), „Блек рок“ (BlackRock Inc.), „Тајгер глобал“ (Tiger Global Management) и „Софт бенк“ (SoftBank Group Corp). Sequoia ја отпиша целосната вредност на своите акции во FTX.com и FTX.us, што е индикација дека фирмата не гледа јасен пат за враќање на нејзината инвестиција.
Сепак, Банкмен-Фрид останал пркосен за време на турбулентниот период од околу 24 часа, кој вклучуваше сè поголеми шпекулации дека Binance нема да може да изнесе договор.
Тој за време на конференциската врска во средата постојано им кажувал на инвеститорите дека едноставно не е точно оти Чангпенг Жао се повлекува од преземањето, посочил извор.
Чангпенг Жао / Bloomberg
Околу еден час подоцна, Binance објави дека навистина се повлекува.
„Се надевавме дека ќе можеме да ги поддржиме клиентите на FTX за да обезбедат ликвидност, но проблемите се надвор од нашата контрола и способност да помогнеме“, се вели во соопштението на Binance, криптоберзата основана од Жао.
Покрај финансиските тешкотии, FTX го привлекува вниманието и на американските власти.
Комисијата за хартии од вредност и Комисијата за тргување со фјучерси на стоки истражуваат дали фирмата правилно управувала со средствата на клиентите, како и за нејзиниот однос со другите делови од крипто-империјата на Банкмен-Фрид, вклучувајќи ја и неговата трговска куќа „Аламеда Рисрч“ (Alameda Research), објави Bloomberg во средата. Службеници на Министерството за правда соработуваат со адвокатите на Комисијата за хартии од вредност, посочил еден од изворите.
Жао во меморандум претходно во средата истакна дека не постои „мастер план“ за преземање на FTX и дека „довербата на клиентите е сериозно разнишана“.
Обновената загриженост за ризикот од прелевање на кризата се рефлектира во падот на цените на дигиталните средства. Биткоинот, по објавата на Binance, падна под 16.000 долари, што е најниско ниво во последните две години.
Прочитајте повеќе: Историјата покажува дека биткоинот може да падне до 13.000 долари
Извршниот директор на „Коинбејс“ (Coinbase), Брајан Армстронг, во интервју за телевизијата Bloomberg во вторникот рече дека ако договорот со Binance пропадне, тоа најверојатно ќе значи дека корисниците на FTX ќе претрпат загуби.
„Тоа не е добра работа за никого“, посочи тој.
