Криптовалутите тонат откако „Бајненс“ го потресе пазарот

Криптовалутите го продолжија својот пад, бидејќи потенцијалното преземање на конкурентската берза ФТХ од страна на „Бајненс“ дополнително потенцира како тензиите во индустријата за дигитални средства сега влијаат на некои од нејзините најсилни играчи.

Биткоинот, најголемиот токен по пазарна вредност, падна дури за 5,4 отсто во средата, по падот од речиси 10 отсто ден претходно, и се тргуваше за околу 17.700 долари во 9:50 часот,во Лондон. Речиси секој дигитален токен се соочи со тешкотии: етер, солана, полкадот, аваланч и мим-токенот доџкоин паднаа.

Извршниот директор на „Бајненс“, Чангпенг Жао, го вџаши крипто-светот во вторникот, објавувајќи дека неговата фирма се подготвува да го купи конкурентот ФТХ (FTX.com), кој доживеа криза со ликвидноста откако Жао објави дека ги продава своите ФТХ-токени во вредност од 530 милиони долари.

Трговците го цитираа твитот на Жао дека писмото со намери меѓу двете страни е необврзувачко, додавајќи кон превирањата на пазарот. Инвеститорите се на работ на поширока криза, со оглед на клучната улога што во индустријата ја имаа ФТХ и неговиот коосновач Сем Банкмен-Фрид.

„Откако влегов во криптоиндустријата во 2016 година, многу ретко доаѓаше до тестирање на нејзината пазарна инфраструктура и учесниците, каков што е случајот во последните 24 часа“, рече менаџерот на крипто хеџ-фонд Ден Либау од „Модулар Асет менаџмент“ (Modular Asset Management).

ФТТ, корисниот токен на берзата ФТХ, падна за повеќе од 75 отсто во изминатите 24 часа и се тргуваше околу 4,20 долари, според „Коингеко“ (CoinGecko).

„Писмото за намери е необврзувачко, што значи дека сè уште може да се јават дополнителни прашања доколку ’Бајненс“одлучи да се откаже од договорот“, рече Дејвид Морено Дарокас, научен соработник во „Криптокомпер“ (CryptoCompare).

Писмото за намери за купување од страна на „Бајненс“ (Binance Holdings) на Жао доаѓа откако на виделина излезе жестоката расправија со Банкмен-Фрид. Жао активно ја поткопа довербата во финансиите на ФТХ, поттикнувајќи да настане егзодус на корисници од три години старата берза ФТХ (FTX.com).

Bloomberg

Ден пред постигнувањето на договорот, Банкмен-Фрид на Твитер објави дека средствата на ФТХ се „добри“.

Условите за итен откуп беа неповолни, а „Бајненс“ соопшти дека договорот доаѓа откако ФТХ претрпела „значителен пад на ликвидноста“ и фирмата побарала помош.

Цената на сол, матичен токен на блокчејнот на Солана, кој е поврзан и со ФТХ и со трговската криптокуќа на Банкмен-Фрид, „Аламеда рисрч“ (Alameda Research) - забележа драстичен пад заедно со другите токени од проектите базирани на Солана. Сол во средата падна за 27 отсто, со што загубите оваа година достигнаа 90 отсто.

„СБФ и ФТХ беа најголемите поддржувачи на Солана“, посочи на Твитер Тенг Јан од компанијата за истражување дигитални средства „Делфи дигитал“ (Delphi Digital). „Оваа ера е завршена. ’Бајненс’ ја презеде работата, а тие во голема мера ќе го фаворизираат блокчејнот БНБ во однос на Солана. ’Аламеда’ имаше околу милијарда долари во заклучен и отклучен сол, кои ќе мора да ги продаде доколку стане несолвентна. Тоа врши голем притисок врз распродажбата на сол“.

Сем Банкмен-Фрид и Чангпенг Жао / Bloomberg

Напнатоста меѓу ФТХ и „Бајненс“ потсети некои трговци на проблемите со кои се соочи „Целзиус“ (Celsius) - криптозаемодавецот што пропадна на почетокот на годинава - како и проблемите што ги забележаа другите компании погодени од годинешниот пад на дигиталните средства.

Теонг Хнг, извршен директор на инвестициската криптофирма „Сатори рисрч“ (Satori Research), нагласи дека ситуацијата е сè уште многу флуидна и додаде: „Уверен сум дека овие два криптогиганта ќе ја направат вистинската работа за да ги заштитат инвеститорите и индустријата“.

Во моментов нема коментари за веста. Биди прв да коментира...

Остави коментар