Крипто рударите очекуваат уште многу банкроти по колапсот на FTX

Компании за копање на криптовалути кои се заведени во Торонто очекуваат повеќе превирања и продолжена криза на довербата во дигиталните средства, по колапсот на FTX на Сем Банкмен-Фрид.

Биткоинот падна на само 15.804,76 долари во понеделникот и изгуби речиси четвртина од својата вредност од 5. ноември, непосредно пред FTX да почне да се распаѓа. Падот на цената на најголемата криптовалута, како и на помалите, врши притисок врз рударите и хеџ-фондовите кои му позајмија пари на секторот, вели извршниот директор на „Хајв блокчејн“ (Hive Blockchain Technologies Ltd).

„Ќе има уште многу банкроти“, посочи Френк Холмс во телефонско интервју. Неверојатниот пад на FTX во банкрот дури влијаеше на веќе несолвентни фирми како „Војаџер“ (Voyager Digital Ltd.), крипто брокерска куќа која поднесе барање во рамки на поглавјето 11 во јули и за која FTX поднесе понуда за преземање, истакнува Холмс. Voyager во петокот објави дека повторно го отвора процесот на лицитација како дел од нејзината стечајна постапка.

„Едноставно не знам кој е следниот. Можеби ова е настан сличен на 'Леман брадерс“ (Lehman Brothers)“, рече Холмс, споредувајќи го колапсот на FTX со клучниот момент во глобалната финансиска криза во 2008 година, кога пропадна фирмата од Волстрит.

Крипто рударите регистрирани на берзата во Торонто забележаа пад на нивната вредност како што се расплетуваше сагата за FTX. Најмногу предничеше „Хат 8 мајнинг“ (Hut 8 Mining Corp.), со пад од 37 отсто овој месец, додека „Хајв“ (Hive) падна за 22 отсто, а „Битфармс“ (Bitfarms Ltd.) за 24 проценти.

Компаниите за копање на биткоин во пад по хаосот од банкротот на FTX / Bloomberg

Сите маржи на биткоин рударите се намалени, изјави во понеделникот претседателот на Bitfarms, Џефри Морфи, за време состанок по повод прашањата за заработка, кој се фокусираше на обидите на компанијата да ги задржи трошоците ниски за да ја преживее таканаречената „крипто зима“. За рударите, високите трошоци за енергија го зголемуваат веќе постоечкиот проблем со падот на цените на криптовалутите.

За многу крипто ентитети, пазарите на капитал сега се цврсто затворени. „Во следните недели и месеци ќе дознаеме колку директори и инсајдери знаеле што се случува зад сцената“, посочи извршниот директор на „Етер капитал“ (Ether Capital Corp.), Брајан Мозоф, во е-пошта, истакнувајќи дека очекува да паднат „многу домина“.

„Компаниите - стартапи или етаблирани - кои сакаат да соберат капитал во ова опкружување веројатно ќе наидат на отпор“, додава Мозоф. „Очекувам за ова да бидат потребни месеци, ако не и години“.

Hive е домаќин на веб-сесии и состаноци со инвеститорите за да одговори на загриженоста и нивното песимистичко расположение. „Компанијата со седиште во Ванкувер никогаш не го користела FTX како трговска фирма и не ги користи нивните криптовалути“, истакна Холмс.

Повлекување на средства

„Битво“ (Bitvo Inc.), платформа за тргување со криптовалути со седиште во Калгари, ги увери клиентите дека продолжува со работа. FTX ги објави плановите за купување на фирмата во јуни, но договорот не е затворен.

Платформата за тргување работи на база на целосна резерва и не позајмува пари, изјави преку телефон извршната директорка, Памела Дрејпер. Иако нестабилноста на платформата се зголеми, компанијата не ги паузираше депозитите или повлекувањата.

„Тоа воопшто не влијаеше на нашата платформа“, рече таа. Засега, Bitvo сè уште е обврзана со купопродажниот договор од FTX, но компанијата ќе открие „кога или ако“ тоа е откажано, нагласи Дрејпер.

Колапсот на империјата на Банкмен-Фрид поттикна одлив на средства од глобалните крипто берзи, при што корисниците повлекоа 3,7 милијарди долари во биткоин и 2,5 милијарди долари во етер помеѓу 6. и 13. ноември, според податоците од „Крипто квант“ (CryptoQuant).

Во моментов нема коментари за веста. Биди прв да коментира...

Остави коментар