Загубил 23 милиони во криптоизмама, но сега соработува со хакерот

Човек што бил жртва на измама, при што загубил повеќе од 23 милиони долари во грабеж на криптовалути, вели дека сега положува надеж во 20-годишникот што бил вклучен во хакирањето на неговиот налог.

На 20 ноември, Елис Пински опиша како убедил вработен во „Еј-ти енд ти“ (AT&T) да му даде контрола врз телефонскиот број што му припаѓал на богат инвеститор во криптовалути.

Тој инвеститор, Мајкл Терпин, преку Зум ја следеше изјавата дадена во рамките на процесот за граѓанска тужба, желен да дознае повеќе за тоа како бил хакиран.

Според кажувањата на Терпин, Пински и неговата екипа биле група тинејџери што го искористиле неговиот телефонски број за да украдат криптовалути во вредност од 23,8 милиони долари од неговата сметка, во еден вид измама наречена замена на СИМ (анг. SIM swapping). Пински никогаш не бил обвинет за кривично дело.

Замената на СИМ се случува кога измамниците се претставуваат како друга личност за да ги измамат телефонските провајдери да го префрлат бројот на таа личност на нова СИМ-картичка. Потоа, со пристап до пораките и повиците на жртвата, хакерите ги заобиколуваат безбедносните мерки, како автентикација од два фактора, за да се инфилтрираат во нивните криптоапликации. Американците пријавиле повеќе од 1.600 инциденти со замена на СИМ минатата година, со вкупна загуба од над 68 милиони долари, покажуваат податоци од ФБИ, што е повеќе од претходната година.

Во октомври, Пински се согласил да соработува со Терпин за да сподели како функционира хакирањето и да му плати 22 милиони долари во граѓанска спогодба.

Доколку Пински започне милионски бизнис, Терпин ќе биде прв во редот за да земе дел од неговиот профит, но нема намера да му ја одзема платата на Пински доколку неговата кариера е „приготвување хамбургери“, посочил тој.

Сепак, Терпин се обложува на првото сценарио, бидејќи, како што вели, Пински е бистар млад човек. Тој сега е студент на Универзитетот во Њујорк, објави „Њујорк пост“. Пински одби да коментира при подготовката на овој текст.

Тој стана еден вид главна сензација, со фотографија од него во помлади години како држи шише „дом перињон“ додека е опкружен со девојки во ноќен клуб во Њујорк, при што таблоидите му го дадоа прекарот бебешка верзија на Ал Капоне.

Неговиот наводен соработник минатата недела беше осуден на 18 месеци затвор за помагање во перењето на криптосредствата на Терпин.

Но, за авторот на текстот, улогата на AT&T можеби е и поинтересна од младите организатори на криптоизмамата. Терпин го тужи телекомуникацискиот гигант во Централниот округ на Калифорнија поради неуспех да ги заштити неговите информации и планира да ја искористи изјавата на Пински како доказ.

Затоа сослушувањето се случило минатиот месец. Терпин одби да сподели многу детали, но тој тврди дека телефонските компании како AT&T треба да направат повеќе за да спречат такви измами.

Bloomberg

„Со оглед на тоа што ова се случува со години, за мене е шокантно што до ден-денес секој службеник во малопродажба, со надомест од 9 долари на час, има ингеренции што се еквивалент на безбедносно одобрение од Белата куќа за да може да внесува записи во базата на податоци на AT&T“, вели Терпин. „Замислете да можете да влезете во вашата банка и да речете: „Ех, го заборавив мојот ПИН-код. Може ли набрзина да ми го кажете?“

Судењето за тужбата на Терпин против AT&T е закажано за средината на следната година.

Запрашан да ги коментира наводите, портпаролот на AT&T, Џим Грир, рече: „Имаме воспоставено безбедносни мерки за да ги надминеме ваквите ситуации и сме во тесна соработка со органите за спроведување на законот, нашата индустрија и потрошувачите за да помогнеме во спречувањето на овој вид криминал“.

Откако му ги украле криптосредствата, Терпин, поранешен новинар, ја презел првичната истрага во свои раце. Тој вели дека приближно во истото време почнал да добива повици од хакери што се кодошеле еден со друг, користејќи еднократни броеви и софтвер за промена на гласот за да го скријат својот идентитет.

Проблемот не е ограничен само на телекомуникациските компании. Во октомври, „Волстрит журнал“ (Wall Street Journal) објави дека десетина поранешни вработени во „Мета“ прифатиле плаќања во размена за пристап до кориснички сметки.

„Сосема сум свесен дека победата во овој случај ќе биде преседан што ќе се користи во илјадници слични ситуации понатаму“, вели Терпин. „И тоа ќе му помогне на 'обичниот човек'“, додава тој.

Во моментов нема коментари за веста. Биди прв да коментира...

Остави коментар