.webp){kind=icon}
Криптокомпаниите повторно ги затегнуваат своите ремени, бидејќи мечкиниот пазар влегува во втората година и индустријата страда од големи падови, кои им штетат на нејзините изгледи.
„Коинбејс“ (Coinbase Global Inc.), „Блокчејн“ (Blockchain.com), „Генезис“ (Genesis) и „Крипто.ком“ (Crypto.com) се меѓу компаниите што започнуваат нов круг отпуштања. Четирите фирми, заедно со берзата „Хоуби“ (Huobi), криптобанката „Силвергејт“ (Silvergate Capital Corp.) и софтверската фирма „Консенсис“ (ConsenSys), колективно отпуштаат илјадници работници во првите две недели од 2023 година, со биланс од повеќе од 1.600 изгубени работни места дури и пред отказите во „Крипто.ком“.
Во писмо до вработените, главниот извршен директор на „Коинбејс“, Брајан Армстронг, рече дека индустријата може да забележи понатамошна зараза и дека уште во минатата година требало да се крати на работници. Коосновачот на „Крипто.ком“, Крис Марзалек, во петокот наведе дека колапсот на ФТХ (FTX) ја наруши довербата во криптото.
Секторот за дигитални средства веќе се намали во однос на периодот од својот бум во 2021 година, кога почетниците масовно ловеле од фирмите во Силиконската долина и Волстрит. За една година, некои од најголемите учесници, како ФТХ, „Блокфај“ (BlockFi) и „Целзиус нетворк“ (Celsius Network) банкротираа, а други ги намалија амбициите да преживеат.
Новиот круг на отпуштања дојде во период кога се заканува можна рецесија во САД, што доведе до намалување на работните места во сите индустрии. Технолошките и финансиските гиганти, како „Амазон“ (Amazon.com Inc.), „Голдман Сакс“ (Goldman Sachs Group Inc.) и „Блекрок“ (BlackRock Inc.), исто така масовно отпуштаат, наведувајќи ја како причина економската неизвесност во услови на повисоки каматни стапки.
Би можело да се случат и натамошни пресврти, бидејќи брокерската криптокомпанија „Генезис“ и нејзината матична фирма „Диџитал куренси груп“ (Digital Currency Group) се обидуваат да ги решат своите должнички проблеми со криптоберзата „Џемини“ (Gemini) и други доверители.
Издвојуваме некои од компаниите што ги намалија работните места во 2023 година.
„Блокчејн“ (Blockchain.com)
Криптоплатформата „Блокчејн“ отпушта 28 отсто од својата работна сила, или околу 110 вработени, според лице запознаено со ситуацијата. Новиот бран укинувања на работни места следува по околу 150-те откази на вработени што беа поделени минатата година. По новите отпуштања, бројот на вработени во компанијата ќе биде 280. Веста првпат беше објавена од „Коиндеск“ (CoinDesk).
„Коинбејс“ (Coinbase)
На 10 јануари, „Коинбејс“ објави кратење на околу 950 работни места, или 20 отсто од својата работна сила. Го затвора најголемиот дел од своите операции во Јапонија и затвора неколку проекти. Минатиот јуни „Коинбејс“ отпушти 18 отсто од својата работна сила, што значеше приближно 1.100 вработени, а во ноември отпушти уште 60.
„Консенсис“ (ConsenSys)
Софтверската компанија „Етереум консенсис“ планира да им подели откази на повеќе од 100 вработени, објави „Коиндеск“.
„Крипто.ком“ (Crypto.com)
„Крипто.ком“ соопшти дека отпуштила околу 20 отсто од својата работна сила низ светот. Компанијата не одговори веднаш на барањата за специфичниот број работни места елиминирани во последниот круг.
„Генезис“ (Genesis)
Брокерската криптокомпанија „Генезис“ (Genesis Global Trading Inc.) на 5 јануари отпушти над 60 вработени, или околу 30 отсто од својата работна сила. Минатиот август компанијата подели откази за 20 отсто од своите работници, додека нејзиниот главен извршен директор Мајкл Моро поднесе оставка.
„Хуоби“ (Huobi)
Криптоберзата „Хуоби“ планира да отпушти 20 отсто од својата работна сила, се вели во соопштението испратено на почетокот од овој месец. Компанијата има околу 1.100 вработени.
„Силвергејт капитал“ (Silvergate Capital Corp.)
„Силвергејт капитал“ во јануари соопшти дека го намалува бројот на вработени за околу 200, што претставува околу 40 проценти од вкупниот персонал на компанијата. Криптобанката претрпе голем одлив на депозити, што ја принуди да продава средства со голема загуба.
