Банкмен-Фрид можеби ќе сведочи двапати - пред судијата и пред поротата

Сем Банкмен-Фрид се мачеше на клупата за сведоци на генералната проба за тоа што сака да ѝ каже на поротата во неговото судење, што наедно е првпат светот да слушне нешто од поранешниот крал на криптото по неколку месеци, додека тој се обидува да се одбрани од обвиненијата за измама.

Банкмен-Фрид помина речиси три часа обидувајќи се да го убеди судијата да му дозволи да сведочи за улогата што ја одиграле адвокатите на FTX во доведувањето до колапс на криптоберзата и наводното лошо управување со корисничките средства. Американскиот окружен судија Луис Каплан претходно пресуди дека 31-годишникот не може да разговара за правните совети за време на воведната расправа, но го одложи неговото очекувано сведочење за да одлучи дали неговите адвокати можат да го прашуваат за тоа на суд.

Во текот на изминатите три недели блиски пријатели и колеги сведочеа дека Банкмен-Фрид ја оркестрирал измамничката шема што доведе до колапс на FTX. За време на судењето тој му кажа на судијата дека адвокатите биле запознаени со некои од одлуките, вклучувајќи ги барањата за заем, депозитите на клиентите и условите за користење. Но тој ги избегнуваше прашањата на обвинителите, често велејќи дека не се сеќава на настаните.

Банкмен-Фрид „има интересен начин да одговара на прашања“, рече Каплан по една дигресија. Тој му рече „да го слушне прашањето и директно да одговори“.

Некогаш почитуваниот криптомагнат се соочува со децении затвор под обвинение дека го насочил трансферот на пари од клиентите на FTX кон хеџ-фондот „Аламеда рисрч“ (Alameda Research), и тоа за ризични инвестиции, политички донации и недвижен имот од висока класа, пред двете компании да паднат во стечај минатата година.

Bloomberg

Каплан во четвртокот наутро рече дека треба да го слушне сведочењето на Банкмен-Фрид за советот што го добил од неговиот адвокат пред да може да одлучи дали да дозволи поротата да го слушне. Така, во изненадувачки потег, тој ги испрати поротниците дома по ручекот и ги остави двете страни да го испрашуваат на оваа тема. Каплан рече дека ќе донесе одлука за ова прашање в петок наутро по локално време.

Тимот на Банкмен-Фрид се обидува да покаже дека голем дел од трансакциите што се предмет на кривична пријава се одвивал пред очите на адвокатите. Тие се надеваат дека поротниците ќе заклучат дека тој немал намера никого да измами.

На испрашувањето од неговите адвокати, Банкмен-Фрид сведочеше дека верувал, врз основа на постојните услови за користење, дека на „Аламеда“ ѝ било дозволено под „многу околности“ да позајмува средства од FTX и да се вклучи во тргување со фјучерси.

По директно испрашување, Банкмен-Фрид доби „палец нагоре“ од неговиот татко Џозеф Банкмен. Но за време на вкрстеното испрашување, тој се бореше да се сети на конкретни разговори со адвокати за кои обвинителите го прашуваа, честопати дополнувајќи ги неговите одговори со дополнителни прашања.

Кога обвинителите го притиснаа Банкмен-Фрид во однос на средствата на корисниците, тој избегнуваше директно да одговори на многу прашања, тврдејќи дека не се сеќава на конкретни разговори или одлуки. Банкмен-Фрид во мај 2022 година изјави дека е „свесен за некои пречки на сметката на 'Аламеда'“ за одложување на ликвидацијата, но не ја знае „нивната точна природа“.

Средства на корисниците

Банкмен-Фрид инсистирал средствата на корисниците да се чуваат одвоено од средствата на компанијата. Тој му кажа на судијата дека помеѓу 2020 и 2021 година било нормално клиентите да испраќаат пари на банкарска сметка на филијалата на „Аламеда“ наречена „Норт дименжн“ (North Dimension) бидејќи FTX имала тешкотии да добие свои сметки. Тој потврди дека инвестициските средства доаѓале од „Аламеда“. Понекогаш, наведе тој, се претпочитало парите да доаѓаат од поединец за  нему и на другите да им се даваат кредити за инвестиции.

„Размислував за тоа од деловна перспектива, обидувајќи се да најдам решение што ќе ги штиклира сите полиња“, рече Банкмен-Фрид. „Мило ми беше што го најдовме“.

„Да, се разбира“, рече Банкмен-Фрид на прашањето дали бил мирен со фактот што адвокатите ги потпишале тие заеми.

За време на сослушувањето, Банкмен-Фрид ги отфрли аргументите на обвинителите дека тој и другите директори на FTX користеле апликации што автоматски ги бришеле пораките за да го прикријат погрешното дело. Тој рече дека всушност се обидел да ги оневозможи таквите функции во времето кога компанијата поднесе барање за стечај во ноември 2022 година. Тој кажа и дека за тоа прашање разговарал со адвокатите на FTX, Рајн Милер и Кан Сан, главниот корпоративен советник што сведочеше на судењето минатата недела.

„Мојата главна идеја беше дека има одредени класи на податоци околу кои имавме многу јасни политики за задржување“, рече Банкмен-Фрид. „Тие обично беа регулаторни“.

Каролин Елисон Bloomberg

Банкмен-Фрид рече дека не мисли дека нацрт-документите, вклучувајќи ги и нацртите на седумте верзии на биланс на состојба на „Аламеда“, споделени од Керолин Елисон на „Сигнал“, треба да се зачуваат. Тој рече дека смета оти е важно да се регистрираат рутински документи и одлуки на компанијата, а бил загрижен за тоа што вработените неформално го кажуваат во разговори што би можеле да бидат извадени од контекст и потенцијално штетни или непријатни доколку бидат објавени во јавноста.

Тој исто така рече дека Сан бил „силно вклучен“ во подготвувањето на новите услови за користење објавени во мај 2022 година, кои беа ажурирани откако FTX се пресели на Бахамите и беше регулирана од тамошната комисија за хартии од вредност. Запрашан од судијата дали ги прочитал целосно ажурираните услови за користење, Банкмен-Фрид рече дека детално прочитал некои делови и ги „прегледал“ другите.

Сослушувањето на сведочењето на Банкмен-Фрид однапред е невообичаена постапка во кривичните предмети, но може да има смисла за сите страни, велат адвокатите.

Обвинителите „не сакаат поротата да биде изложена на овие прашања ако тие бидат исклучени од случајот“, рече Хари Сендик, поранешен сојузен обвинител во Њујорк од компанијата „Патерсон Белкнап“ (Patterson Belknap Webb & Tyler). „Тоа, пак, ѝ овозможува на одбраната да го презентира сведочењето на Банкмен-Фрид без да биде попречувана од постојани приговори“, додаде тој.