Сведочење на Банкмен-Фрид, кулминација во судењето за FTX

Сведочењето на Сем Банкмен-Фрид во судницата во Њујорк в четврток ќе биде најновиот момент кој мора да се види во судењето за измама од висок профил поради колапсот на неговата криптoберза, FTX.

Одбраната ја доведе во прашање одлуката на 31-годишниот Банкмен-Фрид да сведочи, но тоа би можело да биде неговата единствена шанса да ги придобие поротниците по неколку недели инкриминирачко сведочење од страна на неговите поранешни пријатели и колеги.

Некогаш почитуваниот криптомагнат се соочува со децении затвор под обвинение дека го насочил трансферот на пари од клиентите на FTX кон хеџ-фондот, „Аламеда рисрч“ (Alameda Research), и тоа за ризични инвестиции, политички донации и недвижен имот од висока класа, пред двете компании да паднат во стечај минатата година.

„Тој не можеше да престане да разговара со новинарите и други луѓе откако FTX пропадна и пред да биде уапсен, а потоа и додека беше пуштен со кауција, така што никој не треба да биде изненаден што избра да сведочи“, рече Брајан Клајн, поранешен сојузен обвинител.

Врвот на досегашното судење беше сведочењето на Кaролин Елисон, поранешната девојка на Банкмен-Фрид, која тој ја постави за извршна директорка на „Аламеда“. Елисон (28) им кажа на поротниците дека Банкмен-Фрид ја оркестрирал измамата во FTX, која вклучувала и инструкции таа да направи низа изменети биланси за да прикрие милијарди долари земени од корисниците на берзата.

Елисон го привлече вниманието на поротниците и јавноста кога зборуваше за крајот на империјата на Банкмен-Фрид, со солзи во очите велејќи: „Тоа беше најлошата недела во мојот живот“.

Каролин Елисон Bloomberg

Покрај тоа што сведочењето ќе биде клучно за Банкмен-Фрид и неговите адвокати, исто така ќе биде голем момент за десетиците посматрачи на процесот кои чекаат пред судот за да „зграпчат“ едно од ретките места резервирани за јавноста.

Тифани Фонг, крипто-инфлуенсерка, која беше на судењето секој ден, претходно рече дека се надева дека ќе стане во четири часот наутро в четврток и ќе биде во судот до пет за да се осигура дека ќе добие место.

„Навистина сакам да бидам во главната судница“, рече Фонг, којa неколку пати го посети Банкмен-Фрид за време на неговиот домашен притвор во Калифорнија. „Некои луѓе ми рекоа дека ќе бидат во шест или седум часот наутро. Мислам дека можеби тоа е и предоцна“.

За деновиве да дојдат до судењето на Банкмен-Фрид, гледачите мораа да се соочат со безбедносни бариери - куп полицајци, но и комбиња со телевизиски екипи, сите во непосредна близина, фокусирани на судењето на Доналд Трамп за измама од 250 милиони долари пред државниот суд.

Банкмен-Фрид мораше да го преживее сведочењето на поранешните пријатели и колеги, вклучувајќи го и Адам Једиди, поранешен програмер на FTX и пријател од колеџ, Гери Ванг, уште еден пријател од Технолошкиот институт во Масачусетс (МИТ), кој исто така е ко-основач на FTX и Нишад Синг, поранешен директор за инженеринг во FTX.

По тие искази, сведочењето на Банкмен-Фрид ќе биде „преуредување на лежалки на Титаник“, рече Клајн.

Обвинет кој сведочи за кривично дело ризикува да ја поткопа неговата одбрана при вкрстеното испрашување од страна на обвинителите. Банкмен-Фрид сепак одлучи да ја убеди поротата дека неговата верзија за колапсот на FTX е точна.

Се очекува тој да биде на клупата барем цел ден, а завршните зборови и почетокот на расправата на поротата најверојатно ќе се одржат следната недела.

„Ова дефинитивно е како кулминација во филм“, рече Фонг. „Не знам ни што да очекувам“.