Хакерски напад прошири лажна вест дека се одобрени биткоин ЕТФ фондови

Нашироко очекуваната одлука на американската Комисија за хартии од вредност (SEC) за тоа дали да одобри спот биткоин фондови со кои се тргува на берза (ang. Exchange-Traded Fund / ETF) брзо се претвори во голем инцидент по сајбер-безбедноста во вторникот.

Налогот на X на SEC беше компромитиран со лажна објава во која се тврди дека агенцијата дала зелено светло за производите, што за кратко време поттикна раст на цената на најголемата криптовалута во светот. Тоа, исто така, повлече истрага од американските власти за тоа како бил компромитиран налогот на социјалната мрежа на главниот регулатор на Волстрит.

„Ова навистина ги покажува широчината и зачестеноста на сајбер-нападите“, рече Курт Готшал, партнер во адвокатската фирма „Хејнс Бун“ (Haynes Boone) и поранешен регионален директор на SEC. „Иронијата овде е што SEC не покажа многу симпатии кон јавни компании и менаџери на средства што во минатото доживеаја инциденти со сајбер-безбедноста“.

Инцидентот им даде нови аргументи на обожавателите на крипто кои долго време го гледаат претседателот на комисијата Гери Генслер како непријател поради неговата ревност да ја заузди индустријата. Иронијата на инцидентот поврзан со сајбер-безбедноста што го снајде регулаторот, кој постојано предупредуваше за онлајн ранливоста на криптосферата, не беше изгубена кај критичарите кои поминаа години чекајќи SEC да одобри биткоин ЕТФ. Трговците со недели шпекулираат дека агенцијата би можела да одобри неколку од производите веќе в среда.

Истрага

Во изјава доцна во вторникот, регулаторот соопшти дека ќе работи со органите за спроведување на законот за да го истражи инцидентот, дека неовластениот пристап е прекинат и дека објавата не била направена од SEC или од нејзин персонал. Во посебна изјава, Генслер појасни дека не е донесена одлука за ЕТФ.

SEC посочи дека имало нелегална активност на налогот @SECGov X „од непозната страна за краток временски период нешто по 16 часот“ во вторникот. Откако беше отстранета лажната објава, Џо Бенарох, шеф за деловни операции во X, изјави дека „налогот е безбеден, а причините се истражуваат“.

Платформата за социјално вмрежување објави дека „неидентификуван поединец“ го компромитирал налогот на SEC преку воспоставување контрола врз поврзаниот телефонски број. Се додава дека налогот немал опција за автентикација од два фактора во моментот на инцидентот. Таквата автентикација додава дополнителен слој на безбедност, што станува сè поголема потреба како што се множат сајбер-нападите.

Се чека одлука

Десетина компании се пријавија за издавање на спот биткоин ЕТФ фондови во САД. SEC има рок до 10 јануари да преземе акција барем за една од тие апликации, а криптоинсајдерите шпекулираа дека регулаторот ќе го искористи тој датум за да објави голем број одлуки одеднаш.

Постојат две технички барања што мора да се исполнат пред да може да започне тргувањето со спот биткоин ЕТФ. Прво, SEC мора да ги потпише таканаречените поднесоци 19б-4 од страна на берзите што ќе издадат ЕТФ. Второ, регулаторот мора да ги одобри релевантните формулари С-1, кои се регистрации за апликациите од потенцијалните издавачи - список што ги вклучува „Блекрок“ (BlackRock Inc.) и „Фиделити“ (Fidelity).

SEC планира да гласа за поднесоците 19б-4с оваа недела, објави „Блумберг њуз“. Регулаторот можеби ќе преземе мерки за апликациите од издавачите С-1, приближно во исто време. Доколку SEC ги одобри двете групи барања, ЕТФ би можеле да започнат со тргување веднаш следниот работен ден.

Во моментов нема коментари за веста. Биди прв да коментира...

Остави коментар