„Китовите“ остануваат закана за малите играчи на криптопазарот

Почетокот на 2024 го одбележа растот на вредноста на биткоинот кој се зголеми за повеќе од шест отсто во првите три дена од јануари, отскокнувајќи над 45 000 долари.

Биткоинот останува локомотива на криптопазарот, вели во интервју за „Блумберг Адрија“, Александар Тасевски, соосновач на „Крипто хаус“ и генерален секретар на криптоздружението „Кон месечината“ (2 The Moon).

Според него, за очекување е дека криптопазарот во 2024 ќе доживее нов бум.

„Биткоинот сè уште е локомотива која го влече целиот пазар. Како биткоинот оди нагоре или надолу, така и целиот пазар оди нагоре или надолу. Иако генерално би требало голем дел од криптовалутите да бидат независни од биткоинот, сепак во пракса се покажува дека биткоинот ги влече сите останати криптовалути. Она што се очекува во 2024-та е доста големи фондови да се отворат кон криптовалутите, така што тука се очекува да навлезат десетици, стотици, нема да речам илјадници милијарди, но сето тоа ќе придонесе кон една спирала на понуда и побарувачка. Кај криптовалутите постои само понуда и побарувачка зборувам за околу 99,9 отсто , оние што се 0,01 отсто имаат некаква реална подлога зад себе, но криптовалутите се нешто што чија цена ја одредува понудата и побарувачката … Генерално она што е важно за крајниот корисник е дека 2024 е година во која се очекува голем бум на криптовалутите, мој совет – нешто инвестирајте во криптовалути“, вели Тасевски.

Блумберг Адрија

Тој потенцира дека закана за пазарот сè уште се големите играчи познати како „китови“ кои манипулираат со цените на криптовалутите.

„Тука има големи игри, бидејќи криптопазарот е релативно мал, денес е околу илјада и седумстотини милијарди или 1,7 трилиони долари, што е релативно малку ако се земе предвид дека Форексот има меѓу 8 и 9 трилиони долари на ден. Така што сè уште е можно оние големи играчи т.н. китови да манипулираат со цените, продаваат по една цена, создаваат паника, пуштаат вести, па цените одат надолу, за тие повторно да си ги купат оние што ги продале по пониска цена и да купат поголемо количство на криптовалути“, вели Тасевски.

Во однос на регулацијата во Македонија, Тасевски го критикува законот со кој криптовалутите се регулираат како дигиталниот имот.

„Тој закон според мене е тежок за имплементација бидејќи има многу недоречености, бидејќи во цел свет криптовалутите се некако регулирани, но не цврсто, строго и универзално … кај нас се водат како имот, во други држави се водат како валути … криптовалутите би се воделе како валути, тогаш не би се плаќал данок на курсните разлики … Така што, целата оваа област се уште е нова во светски рамки и лично сметам дека ние како држава треба да ги следиме светските трендови, да се следат оние решенија што ќе бидат имплементирани на глобално ниво“, посочува Тасевски. 

Во моментов нема коментари за веста. Биди прв да коментира...

Остави коментар