Растот на биткоинот по враќањето на Трамп исчезнува поради неговите царини

Криптовалутите ги избришаа речиси сите добивки што ги остварија по победата на Доналд Трамп на изборите на почетокот на ноември бидејќи последиците од нападот со царини на американскиот претседател во глобалната трговска војна предизвикаа голема продажба во класата на средства за која вети дека ќе биде нејзин заштитник.

Биткоинот денеска падна под 75.000 долари за првпат од 7 ноември, со што ја намали својата вредност дури за 5,3 проценти. Вкупната пазарна капитализација на сите криптовалути падна за околу 12 отсто, на 2,47 трилиони долари, приближно на нивото на кое беше кога Трамп ја запечати својата победа, според податоците на „Коингреко“ (CoinGecko). Етерот падна на најниско ниво од март 2023 година.

Падот доаѓа во услови кога Трамп се втурна во трговска војна со огромни царини, кои веќе избришаа трилиони во вредност од глобалните акции и ги урнаа надежите дека криптото ќе го издржи притисокот подобро од другите средства. Азиските акции и фјучерсите на американските индекси денеска паднаа, а вредноста на јенот порасна како резултат на продлабочувањето на превирањата на финансиските пазари.

„За момент се чинеше дека криптото може да остане стабилно, но со 24/7 природата на криптопазарите, инвеститорите се разбудија во неделата во целосен ‘режим на продажба’“, рече Чарли Шери, раководител на финансии и криптоаналитичар во „Би-ти-си маркетс“ (BTC Markets).

Податоците на „Коинглас“ (Coinglass) покажуваат дека во изминатите 24 часа околу 868 милиони долари се ликвидирани од биковското обложување, што е најмногу во речиси шест недели.

„Пазарите за опции сугерираат дека притисокот на продажбата може да продолжи со значително зголемување на неопределеноста за продажба на акциите“, рече Шон Мекнулти, раководител во брокерската компанија „Фалкон икс“ (FalconX) за дигитални средства.

Дигиталните средства покажаа одреден отпор на паниката што ги зафати пазарите откако Трамп првпат ја претстави својата тарифна програма, навестувајќи го можното отцепување од гравитациската сила на технолошките акции. Но денешната распродажба покажува дека високата позитивна корелација помеѓу криптото и индексот Nasdaq 100, која преовладува од пандемијата, може да продолжи.

„Криптото обично е водечки показател за ризичните средства“, рече Џулија Џоу, главна оперативна директорка во „Каладан“ (Caladan), производител на криптопазарот. „Очекувајте поостри корекции штом ќе се отворат американските берзи денеска“, рече таа.

Биткоинот утрово се тргуваше по цена од околу 74.600 долари, а етерот за 1.418 долари.