Биткоинот под ризик да падне во замка во услови на макронесигурност

Неодамнешното олеснување за биткоинот, кое ја лансира оригиналната криптовалута на двонеделно највисоко ниво во понеделникот, е во ризик да биде краткотрајно бидејќи пошироката пазарна неизвесност продолжува да ги држи инвеститорите настрана.

Недостигот од биковска инерција, ниските обеми и тековните макроекономски тензии се комбинираат за да создадат услови за она што некои трговци го нарекуваат потенцијална „биковска замка“ на пазар без насока. Пазарните експерти укажуваат на макроекономски ризици, вклучувајќи потенцијални ескалации на царините, загриженост за инфлацијата и геополитичка нестабилност, кои продолжуваат да фрлаат сенка врз цената на биткоинот.

„Важно е инвеститорите да бидат претпазливи во ваква средина: Пазарот останува кревок и лесно може да се манипулира“, вели Кирил Кретов, експерт за автоматизација на тргување во „Коинпанел“ (CoinPanel). „Активноста на малопродажбата е ниска, обемот е тенок, а дури и таканаречените ‘паметни пари’ остануваат настрана. Играчите со вистинска способност да го движат пазарот не го прават тоа - и со добра причина“.

Во текот на март биткоинот се движеше помеѓу 76.000 и 95.000 долари. Сепак, без јасен катализатор за да ја поттикне цената над овие нивоа, пазарот се мачи да добие одржлива биковска траекторија.

Depositphotos

Еден индикатор на претпазливиот сентимент е стапката на финансирање биткоин, која ја одразува разликата во цените помеѓу спот и фјучерс пазарите. Во биковски пазар, цените на фјучерсите се над спот-цените, така што стапката на финансирање е позитивна. И покрај тоа што цената на биткоинот во понеделникот се искачи за повеќе од четири отсто, на 88.786 долари, неговата стапка на финансирање стана негативна, според податоците од „Криптоквант“ (CryptoQuant). Тоа е знак дека трговците повеќе не се подготвени да платат премија за отворање нови долги позиции на пазарот на перпетуални фјучерси на токенот.

Овие фјучерс-договори, кои немаат одреден рок на истекување, често се користат од шпекуланти што сакаат да профитираат од краткорочни ценовни флуктуации. Негативната стапка на финансирање сугерира промена во сентиментот и умереност во побарувачката за левериџ.

Во друг знак на недостиг од убеденост на пазарот, трошокот за позајмување стабилни коини како што се УСДТ (USDT) и УСДЦ (USDC) на децентрализираната платформа за позајмување Ааве (Aave) падна на околу четири отсто, одразувајќи го ризичното мислење меѓу инвеститорите што се прелеа во криптосекторот.

„На Ааве, стапките на позајмување се под влијание на стапките на искористеност на депонираните средства“, рече Страхиња Савиќ, раководител на податоци и аналитика во ФРНТ (FRNT Financial). „Како што се намалува апетитот за левериџ и други трговски стратегии што бараат позајмување, стапките на позајмување на Ааве паѓаат“.

Покрај тоа, искусните инвеститори во биткоин од претходните пазарни циклуси сè уште ги држат своите позиции, надевајќи се на повисоки излезни цени. Тоа, според Кретов, го создава она што тој го нарекува „мртва тежина“ на пазарот, што го прави поподложен на волатилност. Додека волатилноста може да ги исфрли прекумерно левериџираните малопродажни трговци, Кретов верува дека вистинско пазарно чистење, каде што дури и долгогодишните инвеститори капитулираат, е неопходно за да им се обезбеди на големите инвеститори „чиста табла“ за нови позиции.

„Додека не се случи тоа, олеснувачките движења се опасни“, рече тој. 

За појасна детекција на насоката на пазарот, сите погледи сега се вперени кон плановите на американскиот претседател Доналд Трамп да воведе повеќе царини на 2 април, според Аугустин Фан, партнер во „Сигнал плус“ (SignalPlus), провајдер на софтвер за криптовалутни деривати.

„Очекуваме пазарите да продолжат со своето меко закрепнување до крајот на месецот, а следниот голем катализатор ќе биде објавата за царините“, рече тој.