Биткоинот надмина 65.000 долари прв пат по три недели

Биткоинот достигна 65.000 долари за прв пат по околу три недели, што е потпомогнато од заживувањето на побарувачката за наменски американски фондови со кои се тргува преку берзата, поради знаците дека Федералните резерви ќе ја олабават монетарната политика.

Најголемото дигитално средство денеска се зголеми за 1,2 проценти пред да се спушти на 64.000 долари од 13:35 часот во Сингапур. Криптовалутата напредуваше за 7,4 проценти минатата недела, што е најостриот пораст од средината на јули.

Блумберг

Претседателот на ФЕД Џером Пауел во петокот даде најјасна индикација досега дека централната банка е на пат да ги намали референтните стапки, кои се на највисоко ниво во изминативе две децении, што создава поповолна позадина за ликвидноста за глобалните пазари.

Сигналот на Пауел поттикна нето прилив од 252 милиони долари - највисок за повеќе од еден месец - во група од десетина американски спот-биткоин ЕТФ-ови истиот ден, покажуваат податоците собрани од „Блумберг“. Средствата привлекуваат приливи веќе седум дена по ред.

„Сите очи се вперени во Банката на федерални резерви“, рече Сиси Лу МекКалман, основач на советодавната куќа за блокчејн „Вен Линк Партнерс“, додавајќи дека намалувањето на стапката во септември може да го поттикне биткоинот.

Блумберг

За разлика од портфолијата на Биткоинот, група американски спот-Етер ЕТФ-ови претрпеа нето одлив на 23 август. Другите главни токени беа малку променети.

Тонкоин, токен од блокчејн поврзан со апликацијата за пораки „Телеграм“, доживеа загуби откако ко-основачот на „Телеграм“, Павел Дуров беше приведен во Франција.