.webp){kind=icon}
Токенот Торн (TORN) на „Торнадо кеш“ (Tornado Cash) доживеа стрмен пад во вторникот откако американското Министерство за финансии воведе санкции за миксерот за криптовалути.
TORN се намали за 24 отсто за време на азиското тргување, на 22 долари, според податоците на „Коин геко“ (CoinGecko). Токенот изгуби 95 отсто од својата вредност од историскиот максимум во февруари 2021 година.
Спротивно на тоа, поголемите криптовалути како биткоин и етер забележаа помал пад во вторникот, паѓајќи за приближно 1 отсто.
Bloomberg
TORN е изворен токен на Tornado Cash, популарна услуга за криптовалути која им овозможува на корисниците да ги маскираат своите трансакции со мешање на средства од различни извори пред да ги пренесат на крајниот корисник. Оваа функција ја направи претпочитана алатка за хакерите и криминалците за да перат украдени или незаконски стекнати средства.
Според американските власти, севернокорејската групација „Лазарус“ (Lazarus) го користела Tornado за перење пари украдени во големи крипто хакирања.
Безбедносни фирми тврдат дека Tornado Cash бил искористен за перење средства украдени при хакирањето на платформата „Ронин“ (Ronin), кога во март беа извлечени 600 милиони долари, како и пленот од 100 милиони долари од експлоатацијата на платформата „Хармони“ (Harmony).
Податоци од „Дјун аналитикс“ (Dune Analytics) покажуваат дека околу 7,6 милијарди долари биле испратени преку Tornado Cash од почетокот на услугата во 2019 година. Околу 1,54 милијарди долари од тие средства се приходи од криминални активности, според форензичката фирма „Елиптик“ (Elliptic).
Во претходното интервју, Роман Семенов, еден од основачите на Tornado Cash, рече дека е технички невозможно да се спроведат санкции против децентрализираните протоколи поради тоа како се дизајнирани.
