text size
Франција ги проширува своите проверки против перење пари на криптоберзите додека регулаторите се обидуваат да утврдат кои од повеќе од 100 субјекти регистрирани за нудење криптоуслуги во земјата ќе добијат дозволи за работа низ целата Европска Унија во наредните месеци.
Француското тело за супервизија и санација на бонитет, познато како АЦПР (ACPR), спроведува контроли на десетици берзи, а тој потфат започна кон крајот на минатата година, според лица запознаени со ова прашање. Тие побараа да не бидат именувани бидејќи станува збор за доверлив процес.
„Бајненс“ (Binance) и „Коин хаус“ (Coinhouse) се меѓу компаниите што во Франција ги прегледуваат претставници на АЦПР, велат изворите. Како дел од тие проверки, регулаторот минатата година му наложи на „Бајненс“, операторот на најголемата платформа за криптотргување во светот, да ги зајакне своите контроли на ризик, рече еден од изворите.
„Периодичните инспекции на самото место се стандарден дел од надзорот на регулираните субјекти“, се наведува во соопштението на „Бајненс“. АЦПР и „Коин хаус“ одбија да коментираат.
Проверките на Франција доаѓаат во услови на зголемени тензии околу тоа како да се координира спроведувањето на криптозаконите низ цела ЕУ, речиси десет месеци откако прописите на ниво на целиот блок стапија во сила во целост. Франција, Австрија и Италија минатиот месец го повикаа највисокиот надзорник на пазарите на ЕУ да започне директно да ги надгледува големите криптокомпании и да ги заостри правилата на блокот, откако идентификува нееднаквости во начинот на кој се спроведуваат регулативите.
Инспекциите имаат цел да ја проверуваат и потврдат усогласеноста на компаниите со условите за нивна регистрација како субјекти што нудат услуги поврзани со дигитални средства или криптовалути или ознаката ПСАН (PSAN). Тие особено ја тестираат имплементацијата на контролите против перење пари и финансирање тероризам.
За време на инспекцијата, од „Бајненс“ минатата година беше побарано да ги зајакне своите контроли за усогласеност и ризик, според еден од изворите. Вработувањето повеќе луѓе во тие единици или обезбедувањето поголема безбедност на ИТ-системите се меѓу вообичаените барања што ги поставува францускиот супервизор. АЦПР обично им дава на компаниите неколку месеци да се усогласат по инспекциите.
Информациите собрани од АЦПР се споделуваат со Француската управа за финансиски пазари, државен регулатор на пазари. Неодговарање на наодите на АЦПР може да доведе до санкции или да ја компромитира можноста на компанијата да го добие т.н. договор МИКА (MiCA) од Франција, лиценца што им овозможува на фирмите да ги нудат своите услуги низ целиот блок.
Во Франција компаниите имаат рок до крајот на јуни 2026 година да го добијат договорот. Таков договор АМФ досега им додели само на неколку актери, вклучувајќи ги финтек-компанијата „Деблок“ (Deblock), криптокомпанијата „Гоуин“ (Goin), француската апликација за штедење биткоини „Битстак“ (Bitstack) и „Касис“ (CACEIS), субјектот во сопственост на француската банкарска група „Кредит Агрикол“ (Credit Agricole).
АМФ одби да коментира.
.webp){kind=icon}
