Трамп го помилува основачот на „Бајненс“

Oсновачот на „Бајненс“(Binance), Чангпенг Жао доби помилување од претседателот на САД, Доналд Трамп, еден од најголемите потези за целосно прифаќање на криптоиндустријата и давање правни олеснувања на некои од нејзините најистакнати луѓе.

Трамп им рече на новинарите дека Жао бил „прогонуван“ од администрацијата на Џо Бајден. Тој додаде дека не верува дека некогаш го сретнал. „Многу луѓе велат дека тој не е виновен за ништо“, рече Трамп. „Му дадов помилување на барање на многу многу добри луѓе“.

Жао, познат како CZ, го создаде она што ќе стане најголемата берза за криптовалути во светот кога ја лансираше „Бајненс“ во 2017 година. На крајот, тој се најде во неволја затоа што не спроведе соодветни мерки против перење пари таму и се изјасни за виновен за прекршоци во договорот со американската влада што го стави во затвор четири месеци и вклучуваше спогодба од 4,3 милијарди долари.

По веста за помилувањето, од најголемата криптоберза во светот велат дека остануваат целосно посветени на својата глобална мисија за градење безбеден, транспарентен и кориснички ориентиран екосистем. Од „Бајненс“ соопштија дека компанијата сега влегува во нова фаза од своето работење.

„Во ‚Бајненс‘ нашата работа продолжува со обновена енергија и јасна цел. Го градиме следното поглавје, фокусирано на зголемување на пристапот преку намалување на надоместоците, градење доверба и поттикнување на глобалните иновации. Подготвени сме да ги поддржиме креаторите на политики во САД и низ целиот свет во нивните напори да изградат поотворена и подостапна финансиска иднина за сите“, изјавија од „Бајненс“.

Според компанијата, визијата на CZ не само што го етаблирала „Бајненс“ како водечка глобална криптоберза, туку во голема мера го обликувала и развојот на самата криптоиндустрија.

„‚Бајненс‘ останува посветена на создавање систем што им обезбедува на корисниците низ целиот свет поедноставен, побезбеден и поевтин пристап до финансиски услуги“, соопшти „Бајненс“.

Со помош на Хадриана Ловенкрон/Блумберг