Трговците сè поубедени дека биткоинот ќе падне до 80.000 долари

Биткоинот повторно нагло паѓа, а трговците се позиционираат за уште полошо сценарио. Најголемата светска криптовалута во вторникот наутро падна под 90.000 долари за време на тргувањето во Азија, продлабочувајќи ја распродажбата што ги збриша сите добивки годинава. На пазарот на опции учесниците се сè поагресивни во заземањето мечкини позиции, уверени дека падот е далеку од крајот, додека големите купувачи се повлекуваат.

Промената на расположението беше брза и остра. Побарувачката за заштита на нивоа од 85.000 и 80.000 долари силно порасна. Како што покажуваат податоците од „Дерибит“ (Deribit), платформата во сопственост на „Коинбејс“ (Coinbase), особено се тргува со заштитни опции што истекуваат во текот на месецов.

Откако пред само неколку недели го следеа растот на биткоинот до рекордни нивоа, трговците купиле опции вредни повеќе од 740 милиони долари што се обложуваат на продолжување на падот до крајот на ноември, далеку надминувајќи го интересот за оптимистички позиции.

„Недостигот од побарувачка во спот-тргувањето, заснован на уверување, станува сè поочигледен, бидејќи купувачите што ги наталожија позициите во последните шест месеци сега се наоѓаат длабоко во загуба“, изјави Крис Нјухаус, директор на истражување во „Ергонија“ (Ergonia), компанија специјализирана за децентрализирани финансии.

 

Bloomberg

Најголема болка чувствуваат компаниите познати како дигитални трезори: фирми што во текот на годинава наталожија големи количества криптовалути за да се позиционираат како криптооблози на берзата. Додека Мајкл Сејлор со неговата „Стратеџи“ (Strategy Inc.) купи дополнителни биткоини вредни 835 милиони долари, некои од неговите корпоративни колеги се соочуваат со сè поголем притисок да продадат имот за да ги заштитат своите биланси.

Таа продажба создава психолошки притисок: пазарот е преполн со инвеститори што се премногу во загуби за да купуваат уште, но не се подготвени да ги пресечат загубите.

Индексот на сентимент што го составува платформата „Коинмаркеткап“ (CoinMarketCap), кој ги следи движењето на цените, волатилноста, дериватите и други показатели, покажува дека учесниците на криптопазарот се заглавени во состојба на „екстремен страв“.

На сентиментот влијаат и пошироките економски фактори. Трговците со внимание го следат извештајот што ќе биде објавен в среда од страна на „Енвидија“ (Nvidia Corp.), своевиден барометар за технолошкиот сектор и шпекулативниот ризик, како и промените во очекувањата во врска со можноста за намалување на каматните стапки од страна на Федералните резерви (Фед) во декември. Индексот на S&P 500 падна за повеќе од еден отсто, што го намали апетитот за ризик на широкиот пазар.

„Мислам дека Фед и приказните за балон на вештачката интелигенција се два големи спротивставени ветрови за криптото и ризичните имоти пред крајот на годината“, изјави Адам Мекарти, аналитичар во „Каико“ (Kaiko). „Ризикот поврзан со ВИ веројатно се трупа и влијае на сентиментот во криптото, а кога ќе се додаде пораката на функционерите, гледаме одржлив тренд на пад за биткоинот.“

Токенот што го поттикнува „Етериум“, етер, е особено ранлив. Втората најголема криптовалута падна во вторникот на 2.946 долари, што го надмина падот од почетокот на октомври од 20 проценти.

„Етерот е многу изложен на овој тренд, бидејќи најголемите компании што држат дигитални средства моментално се во минус на своите позиции“, изјави Грег Магадини, директор за деривати во „Амбердата“ (Amberdata).

Поширокиот пазар се тресе откако бран на ликвидации во октомври избриша околу 19 милијарди долари во дигитален имот. Отворениот интерес за фјучерс-договори падна, особено кај помалите токени како солана, каде што позиционирањето падна за повеќе од половина, според податоците на „Коинглас“ (Coinglass).

„Таквиот тон се прелева и на криптопазарите, каде што сентиментот сè уште е кревок: последниот пад повеќе одразува широка макронервоза отколку структурни слабости“, изјави Томас Перфумо, глобален економист во криптоберзата „Кракен“ (Kraken).