Само 26 минути беа доволни за пад од 51,1 отсто - нов удар врз криптопозициите на Трамп

Падот во вторникот на крипторударската компанија „Американ биткоин“ (American Bitcoin Corp.) се случи за миг. На Волстрит, во 9:31 часот, само една минута по отворањето на тргувањето, акциите веќе паднаа за 33 отсто. Пет минути подоцна загубите се продлабочија на 42 отсто, а до 9:56 часот надминаа 50 отсто.

Драмата беше толку голема што „Американ биткоин“ веднаш стана симбол не само на криптоколапсот кон крајот на 2025 година туку и на пропаѓањето на низа проекти што семејството Трамп ги туркаше во светот на дигиталните валути изминатава година. Иако поширокиот криптопазар падна околу 25 отсто во последниве два месеца, проектите поврзани со Трамп бележат многу подлабоки загуби.

„Ворлд либерти“ (World Liberty Financial), чиј коосновач е претседателот Доналд Трамп заедно со неговите синови, забележа пад од 51 отсто кај токенот ВЛФИ (WLFI) во однос на максимумот од почетокот на септември, што е многу поголем отколку кај биткоинот и кај индексот на помалите дигитални токени. Истовремено, „Алт5 сигма“ (Alt5 Sigma), компанијата што ја промовираат синовите на Трамп, се соочува со пад од околу 75 отсто, придружен со сè повеќе правни проблеми.

Дополнителен удар доаѓа и од меме-криптовалутите именувани по американскиот претседател и неговата сопруга Меланија, кои од јануари наваму изгубиле приближно 90 односно 99 отсто од вредноста. „Американ биткоин“, чиј коосновач е Ерик Трамп, по драматичниот пад во вторникот е пониска за околу 75 отсто.

Премиумот на проектите „Трамп крипто“ се стопи

Криптопроектите на семејството Трамп бележат многу подлабок пад од самиот пазар

Bloomberg

Овие случувања сериозно го намалија големиот криптокапитал што семејството Трамп го акумулираше во текот на годинава. Но имаат и пошироко значење, како за индустријата на дигитални средства така и за јавната слика на претседателот. Поддршката од Трамп во првите месеци од неговиот втор мандат помогна да поскапат широк спектар криптотокени и ја претвори цената на биткоинот во индикатор за неговиот политички успех.

Сега, пак, она што изгледаше како „Трамп премиум“ ненадејно се претвори во „Трамп товар“, уривајќи еден од клучните столбови што ги држеа криптосредствата и покажувајќи колку брзо може да се стопи довербата во овие шпекулативни пазари, па и во самиот претседател.

„Претседателството на Трамп е меч со две сечила кога станува збор за легитимитетот“, вели Хилари Ален, професорка по право на Американскиот универзитет за правни науки во Вашингтон (American University’s Washington College of Law).

„Трамп почна да лансира свои криптопроекти, од кои многу изгубија вредност, и тоа многу брзо. Ако целта беше да се добие легитимитет преку семејството Трамп, тоа не помогна.“

Bloomberg

„Ворлд либерти“ и компанијата што стои зад меме-криптовалутата на Трамп „Фајт фајт фајт“ (Fight Fight Fight) не одговорија веднаш на барањата за коментар.

Иако американскиот претседател во последно време ја ублажи јавната промоција на криптото, Ерик Трамп во вторникот се огласи на социјалните мрежи, обвинувајќи дека слабото работење на „Американ биткоин“ е последица на истекувањето на периодот на забрана за продажба на акциите, а не на поширока пазарна слабост.

„Нашите основни показатели се речиси ненадминливи“, напиша тој на X. „Сто отсто сум посветен на тоа да ја водам индустријата.“

Да бидеме јасни: драматичните промени кај средствата поврзани со семејството Трамп не се ништо ново за индустријата што е дефинирана преку екстремна волатилност. Дигиталните токени и претходно имале големи падови, по кои следувале закрепнувања. Во вторникот, додека „Американ биткоин“ се мачеше, оригиналната криптовалута имаше еден од најдобрите денови во последните неколку недели, со раст за околу 6 отсто.

Но претходно годинава изгледаше дека поддршката од Трамп кон технологијата конечно може да ги извлече дигиталните токени од бескрајниот циклус на бум и пад и да ги претвори во поцврст дел од финансискиот систем. Ако ништо друго, многумина во криптозаедницата веруваа дека Трамп ќе има доволно влијание за да им обезбеди успех на проектите што му се најважни.

А извесно време се чинеше дека разните вкрстени промоции навистина функционираат. Луѓе што сакаа да ја изразат поддршката за претседателот купуваа трамп-токени и ја туркаа нивната вредност нагоре. Акциите на „Грифон“ (Gryphon Digital) скокнаа за 173 отсто кога во мај објави дека се спојува со „Американ биткоин“ на Ерик Трамп. На првиот ден од тргувањето по спојувањето, во септември, акциите на „Американ биткоин“ пораснаа уште за 16 отсто.

Bloomberg

Овие проекти добија дополнителен поттик и од политиките и регулаторните промени што ги туркаше Трамп, пред сѐ преку законодавството насочено кон воведување на стабилните дигитални монети врзани за доларот во поширока употреба.

Но со текот на времето почнаа да се насобираат знаци на проблеми. Меме-криптовалутите што беа лансирани непосредно пред инаугурацијата, со силна промоција лично од Трамп, постепено го губеа замавот, со само повремени кратки закрепнувања, како по априлскиот раст, откако претседателот им понуди на најголемите сопственици на токенот да присуствуваат на вечера со него.

Џоел Ли, извршен директор на онлајн пазар за електрични возила, ја купил меме-криптовалутата токму за да може да присуствува на таа вечера, но набрзо потоа ја продал. Тој забележал дека работите се влошиле особено по октомврискиот бран нови тарифи што Трамп ги воведе против Кина.

„Луѓето почнаа да сфаќаат дека ова можеби не е она што го замислуваа“, вели Ли.

Мајкл Терпин, долгогодишен криптоинвеститор, вели дека тарифите послужиле како ладно потсетување: „Трамп дава, Трамп зема.“

Но проблемите веќе одамна не се ограничени само на нестабилноста на пошироките пазари. „Американ биткоин“ мораше да се соочи со извештај дека рударските машини што ги користи, од кинески производител, биле предмет на истрага како потенцијален ризик за националната безбедност на САД. Паралелно, „Алт5 сигма“, компанијата што планираше да купи еден од токените издадени од „Ворлд либерти“, доживеа одлив на раководни лица по објавата дека една нејзина подружница била подложена на кривична истрага во Руанда.

„Алт5 сигма“ не одговори на барањата за коментар за последните случувања.

Падот што трае од октомври избриша повеќе од 1 милијарда долари од богатството што семејството Трамп го оствари преку своите криптопроекти и други бизниси. Но, според индексот за милијардери на „Блумберг“ (Bloomberg Billionaires Index), тие и понатаму располагаат со значителни профити. Најголеми загуби трпат малите инвеститори што купуваа средства додека се движeа блиску до врвот.

Кевин Ху, 22-годишен студент од Ванкувер, очекувал продолжување на растот, но, наместо тоа, неговото портфолио со дигитални средства паднало за околу 40 отсто до средината на ноември.

„Мислев дека со претседател што толку отворено ги поддржува дигиталните средства, пазарот барем ќе биде постабилен“, вели тој. „Но реакцијата беше сосема поинаква. А, сето тоа околу меме-криптовалутите, едноставно одврати многу луѓе.“