Британската фунта изгледа поранливо во однос на еврото на пазарите на опции, што е знак дека трговците го гледаат Обединетото Кралство како поизложено на растот на цените на енергентите, дури и по примирјето со Иран.
Опциите покажуваат дека побарувачката за заштита од големи поместувања на фунтата, во споредба со заштита од краткорочни флуктуации, сè уште е поголема отколку во моментот на избувнувањето на конфликтот кон крајот на февруари. Тоа е во спротивност со еврото, каде што сличните мерки во голема мера се нормализирани.
Оваа разлика е значајна затоа што е спротивна на првата реакција на конфликтот. Паритетот евро-фунта падна за околу 1,5 проценти во првата фаза на војната, одразувајќи став дека еврозоната ќе биде особено чувствителна на енергетски шок. Тие загуби во меѓувреме се речиси избришани. Сепак, на пазарот на опции, подолготрајна искривеност сега е поочигледна кај фунтата.
Тоа не значи дека инвеститорите ја сметаат еврозоната за имунa на последиците од војната. Наместо тоа, се чини дека се помалку подготвени да ја исклучат можноста за екстремни поместувања на фунтата отколку кај заедничката валута.
Перспективата е во согласност со пошироката економска средина. Инфлацијата во Обединетото Кралство беше повисока отколку во еврозоната и пред конфликтот, што ги прави трговците почувствителни на ризикот од енергетски шокови што вршат долготраен притисок врз растот на цените.
Анализата на Меѓународниот монетарен фонд (ММФ) покажува дека Обединетото Кралство е меѓу европските земји што се најмногу изложени на повисоки цени на енергијата, поради зависноста од електроцентрали на гас. ММФ исто така предупреди дека енергетски шок би го засилил притисокот врз трошоците за живот и би ги натерал работниците да бараат повисоки плати.
Што велат стратезите на „Блумберг“?
„Еврото веројатно ќе зајакне во однос на фунтата, бидејќи рестриктивните (hawkish) обложувања за ЕЦБ веројатно побавно ќе се повлечат од оние за Банката на Англија. Креаторите на политики во ЕЦБ најверојатно ќе бараат подетален увид за да прогласат крај на опасноста од долготрајни притисоци на цените. Дури и тогаш, пазарите ќе бидат склони кон позиционирање за стабилна депозитна стапка на краток рок“, изјави Адам Линтон, макростратег на „Блумберг“.
Очекувањата за каматните стапки покажуваат слична приказна. И за Обединетото Кралство и за еврозоната, конфликтот предизвика трговците да преминат од очекувања за намалување на каматните стапки кон обложување за нивно зголемување. Но обемот на овој премин беше многу поголем за Британија, бидејќи трговците предвидуваа најмалку две намалувања на стапките од Банката на Англија оваа година.
Заедно, овие податоци покажуваат дека последиците од конфликтот се протегаат надвор од самите каматни стапки. Трговците со опции ја третираат фунтата како поизложена отколку еврото, дури и додека пазарите ги намалуваат најекстремните процени на цените од војната.
.webp){kind=icon}
