Голем пад на пазарот на недвижности во Германија

Бизнисот со недвижности во Германија драстично падна во последниот квартал од минатата година поради зголемените финансиски трошоци.

Во последните три месеци од 2022 година, инвестициите во комерцијални недвижности изнесуваат 9,9 милијарди евра, што е за 50 отсто пониско од петгодишниот просек во тој период, се наведува во извештајот објавен од  банката „БНП Парибас“ (BNP Paribas) во понеделникот. Оттаму посочуваат дека ваквата состојба е резултат на растот на каматите, економското забавување и рекордната инфлација.

Тие додаваат дека овој тренд на намалување треба да продолжи во првата половина од годината, а потоа да се промени во втората половина.

Сличен развој на ситуацијата може да се забележи и на приватниот пазар за недвижности, каде што во 2022 година е забележан пад од 74 отсто во однос на претходната година.

Падот на пазарот на недвижности во последните месеци беше особено забележлив во Шведска, која се смета за водечки пример за актуелниот тренд.

Но, според истражување засновано на илјада испитаници, објавено од банкарската групација СЕБ (SEB), пазарот наскоро би можел да го допре дното.

Bloomberg Mercury

Вредноста на недвижностите во таа земја од март паднала за 17 отсто.

Во последното истражување, бројот на лица што очекуваат цените да продолжат да паѓаат опадна на 49 отсто од 58 отсто, а бројот на оние што очекуваат да почнат да растат се искачи на 28 отсто од 22 отсто.

Клучниот показател за цените на недвижностите во Шведска, кој го води шведската централна банка, сепак вели дека трендот на намалување продолжува, а економистите на СЕБ исто така сметаат дека моментот за пресврт сè уште не е дојден.

„И натаму имаме мрачен поглед на движењето на цените на становите и куќите поради инфлаторните притисоци, зголемените каматни стапки и слабеењето на економијата, како и тешкотиите со кои се соочува владата во однос на субвенциите поврзани со високите цени на електричната енергија. Значи, иако учесниците во истражувањето се помалку песимистички за движењето на цените на недвижностите, очекуваме цените да продолжат да паѓаат“, напишаа аналитичарите на СЕБ.