.webp){kind=icon}
Ултра луксузен стан во Хонг Конг е изнајмен за 1,1 милион хонгконгшки долари (околу 133.000 евра) месечно, што е знак дека и покрај падот на цените на пазарот на недвижности, трансакции со висока вредност се уште се одвиваат во тој град.
Станот се наоѓа на 11 Плантејшн Роуд и е со површина од околу илјада метри квадратни, објасни запознаен со трансакцијата кој побара анонимност бидејќи се работи за приватна информација. Сопственик на имотот е „Варф Холдингс“ (Wharf Holdings).
Иако договорената цена е пониска од рекордните 1,35 милиони долари, за кои истиот имот беше изнајмен во 2021 година, сепак тој е меѓу најскапите имоти на еден од пазарите со највисоки цени во светот.
Претставниците на „Варф холдингс“ не беа веднаш подготвени да коментираат за трансакцијата.
Цените на пазарот на станбен имот во Хонг Конг се во долгорочен пад бидејќи високите каматни стапки и макроекономската несигурност ги одвраќаат купувачите. Дури и луксузниот сегмент настрада, па некои многу скапи имоти сопствениците мораа да ги продаваат со високи попусти во споредба со времето пред пандемијата.
Има и исклучоци, бидејќи некои купувачи ја користат можноста за да се стекнат со станови по пристапни цени, според минатомесечниот глобален извештај на Најт Френк.
„Со зголемувањето на патувањата во остатокот од годината, постои потенцијал за зголемена побарувачка од континенталните кинески купувачи за луксузни станбени имоти“, рече Хо-Пин Тунг, шеф на канцеларијата на Најт Френк во Хонг Конг. „Но, главната пречка е ограничената понуда на луксузни станови од висока класа“, додаде тој.
