По трговската, добиваме и валутна војна

На маргините на ескалацијата на трговската војна што оваа година ја започна американскиот претседател Доналд Трамп, почна и валутна војна. Засега губитник од артилерискиот оган на царините е американскиот долар, кој загуби многу од вредноста во однос на другите големи светски валути.

Аналитичарите на „Блумберг Адрија“ пред една недела изјавија дека „американскиот долар во моментов не е популарна валута“. Сепак, тие и понатаму очекуваат курсот евро-долар оваа година да флуктуира околу 1,06, со зголемена нестабилност околу оваа прогноза.

„Довербата во доларот е загрозена“, изјави за „Блумберг“ Кристофер Вонг, девизен стратег во „Оверси-Чајнис бенкинг корпорејшн“ (Oversea-Chinese Banking Corporation). Тој додаде дека факторите како што се опаѓање на американската доминација и зголемување на американскиот долг ги поттикнуваат сомнежите за статусот на доларот како резервна валута.

Со мислењето на Вонг се согласуваат и други аналитичари. „Денес сме сведоци на уште еден показател дека структурата и природата на односот на американскиот долар со глобалните пазари се сменија“, изјави за „Ројтерс“ (Reuters) Тиери Визман, стратег за глобални девизни курсеви во „Меквајар“ (Macquarie). „Мислам дека влегуваме во режим на продажба на американски долари“, изјави за „Ројтерс“ Брент Донели, претседател на „Спектра маркетс“ (Spectra Markets).

Еврото зема замав

Еврото оваа година порасна за дури 9,39 отсто во однос на доларот и се движи на највисокото ниво во последните неколку години. На движењето на еврото ќе влијае и утрешната одлука на Европската централна банка (ЕЦБ) која ќе одлучува за каматните стапки. Пазарите речиси едногласно очекуваат намалување на каматната стапка за 25 базични поени.

 

„Диференцијата на каматните стапки го фаворизира доларот, но фокусот се префрли на ефектите од американските царини. Јакнењето на американскиот долар во последниот квартал на 2024 година значително се подобруваше до април 2025 година. Можноста за постигнување мировен договор во конфликтот меѓу Русија и Украина беше во корист на еврото, додека загриженоста за американската рецесија беше негативен фактор за доларот“, изјавија аналитичарите на „Блумберг Адрија“.

ЕЦБ ќе ги намали каматните стапки на следните четири состаноци бидејќи економските трошоци за американските царини се зголемуваат, рекоа минатата недела аналитичарите на „ЏП Морган Чејс“ (JPMorgan Chase). Растот на еврозоната на краток рок ќе добие удар поголем од претходно очекуваното, што ќе доведе до „многу слаба“ експанзија во следните три квартали, посочија аналитичарите на банката во својата истражувачката белешка.

Инвеститорите бегаат во прегратките на швајцарскиот франк

Доларот во четвртокот го забележа најголемиот дневен пад од 2022 година, при што многу инвеститори бараат безбедно засолниште, особено во швајцарскиот франк. Швајцарската валута тој ден зајакна околу четири отсто во однос на доларот, што е негов најголем скок од 2015 година, кога Швајцарската национална банка (СНБ) ги изненади инвеститорите и го укина ограничувањето на курсот на валутата во однос на еврото.

По ненадејниот раст во четвртокот, франкот продолжи да расте во однос на доларот. Сегашниот курс на швајцарскиот франк во однос на доларот е 1,2253. „Швајцарскиот франк добива важност како безбедно засолниште од пазарната несигурност околу царините“, изјави за „Блумберг“ Бред Бехтел, глобален шеф за девизи во „Џеферис фајненшл груп“ (Jefferies Financial Group).

Меѓутоа, швајцарската централна банка во моментов се соочува со други предизвици. Економистите анкетирани од „Блумберг“ веруваат дека Швајцарската национална банка ќе избегне намалување на каматните стапки под нулата оваа година, бидејќи се обидува да ја задржи силата на франкот. Сегашната каматна стапка на СНБ е 0,25 отсто.

Bloomberg

 

Јапонскиот јен достигна највисоко ниво во последните шест месеци

Висок раст во однос на доларот оствари и јапонскиот јен на крајот на минатата недела, кој порасна за повеќе од два отсто. Јенот расте главно поради зголемената побарувачка за безбедни засолништа, но постои загриженост за тоа каква монетарна политика ќе усвои Банката на Јапонија (БОЈ) во иднина.

Според аналитичарите на „Голдман Сакс“ (Goldman Sachs), Банката на Јапонија може да размисли за замрзнување на зголемувањето на каматните стапки доколку јенот зајакне кон 130 за долар и ослабнат изгледите за инфлација. Сегашниот курс на доларот е 143 јени.

Силната апрецијација на јенот може да го намали профитот за јапонските извозници, да ги намали цените на увозот, да ги ограничи домашните инвестиции и да го ослабне растот на платите, што ќе стане предизвик за БОЈ да остане на сегашната патека на затегнување на монетарната политика, напишаа економистите на „Голдман“ во вчерашниот извештај.

Долар наспроти Јуан

И покрај слабоста, доларот расте во однос на кинескиот јуан бидејќи Пекинг дозволува јуанот да ослабне за да ја поддржи својата извозно ориентирана економија, која е погодена од царините на Трамп. Пред нешто повеќе од една недела јуанот падна на најниско ниво во однос на доларот од глобалната рецесија во 2008 година.

„Од перспектива на кинеската централна банка, слабеењето на јуанот ќе биде од корист за извозниците погодени од американските царини од 145 отсто“, сметаат аналитичарите на „Блумберг Адрија“. „Послабата валута не може многу да и помогне на Кина во трговските односи со САД бидејќи ова ниво на царини нема да биде математички компензирано со послаб јуан, но може да и помогне на Кина да ги подобри трговските односи со другите партнери бидејќи послабата валута значи поконкурентни производи.

Токму со второто деновиве се занимава кинескиот лидер Шји Џјинпинг, кој брза низ Југоисточна Азија со дипломатска офанзива. Вчера пишувавме дека кинеското политичко раководство се обидува да го искористи економското „самоповредување“ на Соединетите Американски Држави, кои според економистот Марко Јаклич, Трамп се повеќе ги вози во геоекономска и геополитичка изолација.

Една од главните можности што ја гледа кинеската комунистичка номенклатура е токму слабеењето на доларот и проширувањето на трговијата деноминирана во јуани.

Bloomberg

 

Сепак, има многу критики за актуелната монетарна политика на Пекинг. „Си-ен-би-си“ (CNBC) анкетираше 11 економисти кои рекоа дека Кина нема да може го да користи слабиот јуан како оружје во трговска војна, бидејќи таквиот потег може да предизвика нестабилност во финансиските текови. Меѓу 11-те аналитичари, мнозинството верува дека на долг рок јуанот нема значително да ослабне и дека кинеската централна банка ќе обезбеди уредна и постепена депрецијација.

„Блумберг“, пак, се повикува на предупредувањата од аналитичарите дека значителното слабеење на јуанот може да има последици, вклучително и одлив на капитал, што креаторите на политиката сакаат да го избегнат. Последен пат кога Пекинг го девалвираше јуанот во 2015 година, Кина забележа одлив на капитал од речиси 700 милијарди долари во истата година, според Институтот за меѓународни финансии.

„Големата депрецијација на јуанот би била премногу вознемирувачка за пазарите и за трговските партнери на Кина, така што не мислиме дека таков исход е веројатен“, изјави за „Блумберг“ Веи Лианг Чанг, стратег во „ДБС банка“ (DBS Bank). „Кина може да види потреба да се задржи добрата волја на трговските партнери во сè пофрагментираниот глобален трговски систем“.

 

 

„Централната банка внимателно и со мали чекори го движи фиксниот курс меѓу доларот и јуанот бидејќи сака да избегне ненадејни реакции на пазарот“, велат аналитичарите на „Блумберг Адрија“, додавајќи дека за слабеењето на јуанот придонесува и слабеењето на самиот долар, што го прави јуанот уште поевтин во споредба со другите валути.

Нашите аналитичари очекуваат јуанот дополнително да ослабне, поттикнат од зголемувањето на разликата во каматните стапки во корист на САД, намалените извозни изгледи поради царините, како и намалените директни инвестиции во Кина, што секако ќе го намали приливот на долари и ќе ја поддржи депрецијацијата на јуанот.

„Фокусот ќе биде ставен на трговските текови и степенот до кој Кина може да го пренасочи извозот од САД на други пазари, а со тоа да се намали влијанието на царините. Послабиот извоз директно ќе се претвори во послаб увоз на суровини, што ќе ги намали девалвациските притисоци врз јуанот“, велат аналитичарите на „Блумберг Адрија“, заклучувајќи го коментарот со прогноза дека очекуваат до крајот на годината девизниот курс долар-јуан да биде на ниво од 7,4 јуани со напомена дека расте ризикот за јуанот.