Доналд Трамп предизвика интерес кај европските лидери за валутните пазари. Откако еврото порасна во однос на доларот, францускиот претседател Емануел Макрон во приватни разговори со шефицата на централната банка Кристин Лагард во Брисел минатата недела поставувал прашања за прогнозите за курсот, наведуваат извори запознаени со тие разговори. Лагард се обидувала да ги убеди лидерите на Европската Унија дека враќањето на Трамп нуди можности за блокот, наведуваат соговорниците.
Среде пазарна несигурност, додека Трамп ги менува економските политики што со децении го поддржуваа американскиот просперитет, некои од елитните носители на одлуки на континентот гледаат можност валутата на ЕУ да доживее преродба.
Германија месецов ја отфрли децениската фискална претпазливост, за да помогне во заживувањето на својата економија и обновата на војската, што предизвика широка промена на цените на европските средства, а лидерите преиспитуваат и други табуа што долго време ја кочеа ЕУ. Францускиот претседател, поранешен инвестициски банкар, ја искористи таа можност да ја промовира својата визија за Европа како навистина автономна геополитичка сила.
Перспективата за единствената валута станува дел од таа слика.
„Не треба да се криеме, еврото е голем успех веќе 25 години“, рече претседателот на Бундесбанк, Јоаким Нагел, при посетата на француската престолнина на почетокот на месецов. „На крајот, ако се позиционираме како поконкурентни, еврото како резервна валута ќе има поголема корист“.
Кристин Лагард
Bloomberg
Вратите за тоа се отвораат додека Трамп ги поткопува темелите на доларот како глобална валута. Тој ја отежнува трговијата со царини и со вербални напади врз пријателите и непријателите, ги ослабува обврските кон НАТО, а советниците го споменуваат и т.н. договор Мар-а-Лаго, кој би можел да ги преуреди глобалните финансии.
Исто така, тој се залага за намалување на даноците, што би можело дополнително да ги прошири буџетските дефицити. Конгресното биро за буџет неделава предупреди дека САД би можеле да имаат дефицит веќе во август ако не се постигне договор за зголемување на горната граница на долгот.
Сепак, структурната промена на глобалните резерви од долар во евро е многу долгорочна идеја, ако е воопшто можна. Претходните шпекулации за тоа дека американската валута може да биде заменета повеќепати се покажаа како неточни. Последните податоци покажуваат дека еврото сочинува само 20 проценти од странските резерви во светот, додека доларот има близу 60 проценти, и тоа е доминација што малку се променила со текот на времето.
И додека непријателскиот став на администрацијата на Трамп ги поттикнува политичарите на ЕУ да преземат значајни чекори, напорите да се комплетира единствениот пазар на ЕУ со банкарска унија и унија на пазарите на капитал веќе со години се во застој.
Bloomberg
Официјалните лица во Берлин исто така сè уште го исклучуваат издавањето заеднички обврзници на ЕУ, уште еден чекор што би ја зацврстил привлечноста на еврото за инвеститорите. Сепак, тие признаваат дека дебатата за тоа се забрзува, наведува извор запознаен со нивните размислувања.
На самитот во Брисел, Пашал Донохое, шеф на Еврогрупата на министри за финансии, рече дека постои огромна долгорочна можност ако блокот може да ги направи своите пазари поефикасни, рекоа извори запознаени со разговорите. Лагард им рече на лидерите дека статусот на САД како засолниште е загрозен од политичките одлуки на Трамп.
Ако официјалните лица успеат да постигнат напредок во интеграцијата на капиталните пазари на ЕУ, имаат шанса да привлечат повеќе инвестиции од оние што бараат алтернатива на средствата деноминирани во долари, додаде таа.
Изгледите дека еврото ќе направи каков било пробив се тешки за европските економии, претпријатија и домаќинства. Таканаречената прекумерна привилегија на доларот создава апетит за американски долгови, што значи подлабоки, поликвидни пазари, кои го прават финансирањето полесно и поевтино.
Колку е поголема улогата на валутата во светот толку поголема автономија имаат носителите на одлуки да постават фискални и монетарни политики што се идеални за нивната економија, без потреба премногу да се грижат за наглите промени на девизниот курс што влијаат на инфлацијата. Силата на валутата исто така им даде предност на американските банки на меѓународните пазари и им овозможи на САД да имаат влијателен глас на меѓународните форуми што ги пишуваат и применуваат правилата на глобалниот капитализам.
„Постојат низа предности што се и економски и геостратегиски“, рече Јенс ван Клостер, политички економист на Универзитетот во Амстердам. „Сè уште не сме таму, тоа е јасно, но луѓето потценуваат колку брзо овие работи можат да се поместат, бидејќи мислат на фунтата, на која ѝ требаше цел век да биде заменета со доларот“.
Bloomberg
Зголемување на вредноста на еврото
Трговците им даваат предност на долгорочните цели, подигнувајќи го еврото и поттикнувајќи подобри перформанси на европските акции. Единствената валута годинава зајакна повеќе од четири проценти во однос на доларот.
Но надминувањето на тоа е голем предизвик. Европа би морала да ги реши огромните пречки и спротивставените национални интереси, кои во минатото доведоа многу работи во прашање.
Клучен елемент е поголема интеграција на големите, но поделени пазари на долгови, потенцијално со повеќе заеднички емисии што би можеле да дејствуваат како алтернативно сигурно средство на американските обврзници.
Макрон со години се залага за заедничко задолжување, а во последно време и за финансирање на трошоците за одбрана и за технологија.
„Имаме можност да создадеме вистински финансиски систем на доверба во Европа со можности за европски средства, но не веднаш, тоа е прашање на потенцијал“, рече главната економистка на „Сосиете женерал“ (Societe Generale), Михала Маркусен. „Не мислам дека наскоро ќе преминеме од систем заснован на долар на систем заснован на евро“.
.webp){kind=icon}
