Врската долар–нафта е сè што е моментално важно на девизниот пазар

Американскиот долар во последните денови е под влијание на еден клучен фактор додека војната на Блискиот Исток се продлабочува: цената на нафтата.

За само една недела, историскиот скок на цените на енергијата предизвикан од американско-израелскиот напад врз Иран ги наруши прогнозите за инфлацијата и економскиот раст низ светот. Тоа се однесува и на САД, каде што цените на американските државни обврзници паѓаат. Сепак, доларот продолжи да јакне. Неговиот раст е поттикнат од позицијата на САД како најголем производител на нафта во светот, како и од улогата на доларот како валута во која се тргува со нафта на глобално ниво, велат трговци и стратези.

Индексот на доларот на Блумберг (Bloomberg) порасна за речиси 1 отсто од почетокот на американските и израелските напади врз Иран на 28 февруари. Доларот зајакна во однос на сите главни валути освен канадскиот и австралискиот долар, две валути кои исто така се силно поврзани со глобалните цени на енергијата. Во меѓувреме, фјучерсите на суровата нафта Брент пораснаа за околу 25 отсто. Како резултат на тоа, показателот за краткорочната корелација меѓу нафтата и доларот во март нагло се сврте во позитивна насока.

„Пазарот брзо сфати дека функционираат само неколку трговски позиции“, изјави Нејтан Туфт, портфолио менаџер во „Манулајф инвестмент“ (Manulife Investment Management). „Тоа се нафтата и доларот.“

Сè посилната врска меѓу доларот и нафтата во фокус поради војната со Иран

Bloomberg

Анализа на „Блумберг“ на активноста на пазарот на опции покажува слична слика. Околу 60 отсто од трансакциите оваа недела со евро-долар деривати преку „ДТЦЦ“ (Depository Trust & Clearing Corporation) биле обложувања дека доларот ќе зајакне во однос на еврото. Во јануари и февруари, пак, просекот беше околу 60 отсто во корист на еврото. Промената веројатно одразува пазар кој сè повеќе се фокусира на изложеноста на единствената валута на увозот на енергија.

„Продолжуваме да размислуваме во рамки на можностите во економиите што произведуваат нафта наспроти оние што не произведуваат“, напиша во вторникот Тиери Визман, глобален стратег за девизни пазари и каматни стапки во „Маквари“ (Macquarie Group).

Неодамнешниот скок на доларот делумно го поништува трендот што беше присутен од инаугурацијата на претседателот на САД, Доналд Трамп: слабеење на доларот поттикнато делумно од пошироката неизвесност околу трговските и економските политики на САД. И покрај последните добивки, индексот на доларот на Блумберг и понатаму е понизок за околу 6 отсто во последните 12 месеци.

Пред почетокот на војната, доларот често имаше негативна корелација со нафтата, односно слабеше кога цените на нафтата растеа, изјави Николас Вол, раководител на глобалната стратегија за девизни пазари во „ЏП Морган“ (JPMorgan Asset Management). По бомбардирањето на 28 февруари, цените на нафтата и доларот растеа паралелно, поради што некои почнаа валутата да ја нарекуваат петродолар.

Трендот продолжи и во вторникот, кога индексот на доларот на Блумберг падна за 0,4 отсто, додека цената на глобалната референтна нафта Брент се намали за речиси 14,7 отсто.

Сепак, колку подолго трае конфликтот на Блискиот Исток, толку почувствителни ќе стануваат американските потрошувачи кои внимателно ги следат цените на бензинските пумпи по растот на цените на нафтата. Тоа на крајот може да го забави идниот економски раст во САД, како и во другите големи економии во светот, што на подолг рок би можело да изврши притисок врз јачината на доларот.

„Ова е приказна за релативна сила, но не би одела дотаму да кажам дека американскиот долар е ‘петродолар’“, изјави Кети Џонс, раководителка на стратегијата за инструменти со фиксен приход во „Чарлс Шваб“ (Charles Schwab). „Американската економија веројатно ќе забележи забавување на растот на БДП како резултат на повисоките цени на енергијата што влијаат врз потрошувачката, па затоа во целина тоа не е нето позитивно.“

Што велат стратегите на „Блумберг“...

„Нафтата се продава во долари, голем дел од светската трговија се финансира во долари, а огромен дел од глобалните долгови се номинирани во американската валута. Кога цената на нафтата нагло расте, тоа практично претставува директен шок на побарувачката за валутата што е во срцето на системот на петродоларот.“

— Брендан Фејган, стратег во МЛИВ

Макроинвеститорите сè повеќе се соочуваат со дилема додека ги разгледуваат и ценовните шокови од наглото поскапување на нафтата и потенцијалниот удар врз глобалниот економски раст, изјави Кристофер Ганстер, раководител на фиксниот приход во „Фиделис“ (Fidelis Capital Partners). Пазарот продава американски државни обврзници и купува долари, посочи тој, што е контраинтуитивен ефект од војната.

„Гледате судир меѓу бегството кон побезбедни средства и инфлаторните ефекти“, рече Ганстер.