Силниот долар ја турка надолу вредноста на металите

Златото е на најниско ниво од 2020 година, додека бакарот и железната руда паѓаат бидејќи вивнувањето на вредноста на доларот до нов рекорд ги зголеми стравовите за глобалните економски изгледи.

Британската фунта, исто така, достигна рекордно ниско ниво, а кинеската валута се доближи до најниското ниво од 2008 година. Инвеститорите најдоа прибежиште во американската валута, а не во златото, додека монетарното заострување ги замаглува изгледите за раст.

„Пазарот го зафаќа страв од рецесија, со оглед на фактот дека американскиот долар расте и дека веројатно ќе продолжи да расте“, изјави Џесика Амир, стратег во компанијата „Saxo Capital Markets“ во Сиднеј.

Златото и бакарот паднаа за повеќе од 1 отсто, додека железната руда го продлабочи двонеделниот пад.

Bloomberg Mercury

Иако златото претставува традиционално прибежиште во време на економски потешкотии, вредноста на благородниот метал падна во последниот месец. Златните прачки влегоа во мечкин пазар и се тргуваат на ниво од 20 отсто под рекордната цена во 2020 година.

Бакарот, кој што се смета за предводник на глобалниот раст, всушност го достигна најниското ниво од јули бидејќи инвеститорите се обложуваа на поостро забавување на економијата во САД и повеќе турбуленции на побарувачката во Европа во време на енергетска криза.

Железната руда потона за околу 20 отсто во ова тримесечје додека инвеститорите и натаму стравуваат поради долготрајната криза во делот на недвижнини што го зафати градежниот сектор.

Златни мечки

Металот, кој што не носи камати, а чија цена се мери во американска валута, обично има негативна корелација со доларот и каматните стапки.

Во наредната недела пазарот би требало да се соочи со нова нестабилност поради објавувањето на американските податоци за инфлација и ангажманот на банкарите од Федералните резерви (ФЕД).

„Златото уште е во тренд на пад, бидејќи залетот уште е кај доларот“, рече Николас Фрапели, глобален директор на институционалните пазари во „ABC“ во Сиднеј. Златните прачки ќе се стабилизираат на нивото од околу 1.600 долари за унца, рече Фрапели.

„Spot“ златото падна за дури 1 процент, на 1.626,93 долари за унца. Бакарот на Лондонската берза на метали падна за 1,1 отсто, на 7,351 долар за тон, а се повлекоа и алуминиумот и цинкот.

Железната руда во Сингапур падна за 3 проценти, на 95 долари за тон.