Европа тешко може да се потпре на американски гас за следната година

Европа прилично успеа да ја пополни празнината што ја оставија намалените текови на рускиот гас, со испораки од САД, но сепак, тие испораки нема да можат во целост да го покријат недостатокот.

Додека американскиот гас сега сочинува 40 отсто од увозот на течен природен гас во Европа, тој ќе надокнади само дел од дефицитот од Русија следното лето, прогнозира BloombergNEF. Тоа значи дека следната година, кога континентот ќе биде соочен со подолг период без руски гас, ќе биде потешко да се надополнат залихите.

Обезбедувањето на залихи кои не му се потребни на најголемиот купувач во Азија е од клучно значење за Европа бидејќи ги заменува резервите од гасоводот за супер-ладено гориво. За да се задоволи идната побарувачка, Европа ќе мора да остане атрактивен пазар за продавачите и да привлече околу 70 отсто од глобалните спот набавки, првенствено од САД, бидејќи растот на производството на течен природен гас (ЛНГ) ќе остане ограничен во следните неколку години.

Бидејќи намалувањето на снабдувањето од Русија, некогаш најголемиот снабдувач на гас во Европа, се случи на крајот на летната кампања за складирање, недостигот ќе биде уште поочигледен следната година.

ЛНГ следната година нема во целост да ја надомести загубата на руски гас / Bloomberg Mercury

„Понудата од САД е особено чувствителна на цените и ќе се прелее на премиум пазарот, каде што Европа ќе остане доколку азиската побарувачка не се зголеми“, вели аналитичарот на BNEF, Арун Тора. „Сепак, зголемување во однос на претходната година не е доволно за во целост да се компензира намалувањето во снабдувањето од рускиот гасовод, со помалку од половина од овие количини покриени преку зголемувањето на количините на течен природен гас“.

Според BNEF, увозот на ЛНГ во северозападна Европа и Италија меѓу април и септември најверојатно ќе се зголеми за 9 милијарди кубни метри во однос на претходната година. Но, со прекинот на испораките од клучниот гасовод „Северен тек“ и постојаниот ризик од целосно исклучување преку Украина, недостатокот од Русија може да достигне 20 милијарди кубни метри.

Еден проблем е што има ограничено снабдување во САД. Прекинот на проектот „Фрипорт“ (Freeport) во Тексас значи дека извозот на ЛНГ во САД годинава ќе се зголеми за 12 отсто, што е помалку од очекуваното, а со истата стапка ќе порасне и во 2023 година, според Bloomberg Intelligence.

Друг проблем е неизвесноста околу тоа каде ќе оди овој ЛНГ. Големите енергетски компании и трговци го обезбедија најголемиот дел од американскиот извоз и исто така во голема мера го заклучија идното американско снабдување, така што можат количините да ги испратат таму каде што цените се највисоки. Ова значи дека поголем дел би можел да оди во Кина, наместо Европа, ако олеснувањето на ограничувањата поради Ковид-19 придонесe за зголемување на тамошната побарувачка.

Аамерикански пазар

Европските набавки им помагаат на САД да го задржат извозот на гас блиску до максималните нивоа и да го ограничат зголемениот трговски дефицит. Но, силната глобална побарувачка исто така влијае врз историски високите цени во Америка, зголемувајќи ги сметките за енергија на домаќинствата и поттикнувајќи ја инфлацијата.

Во Нова Англија постои ризик од недостиг од гас поради големиот извоз од САД, објави Федералната регулаторна комисија за енергетика.

Bloomberg Mercury

Америка во моментот испраќа околу 60 отсто од својата понуда во Европа, двојно повеќе од минатогодишниот удел, вели Кси Нан, аналитичар во норвешката консултантска компанија Rystad Energy. Американскиот државен секретар Антони Блинкен посочи дека САД работат на дополнително зајакнување на трговијата откако годинава станаа главен снабдувач на ЛНГ за Европската унија и Велика Британија.

Извозот на ЛНГ од САД постојано се зголемува од почетокот на 2016 година и главно беше насочен кон Јужна Америка и Азија. Тоа се смени кон крајот на минатата година кога зголемените цени во Европа ги поттикна трговците да ги пренасочуваат испораките, во некои случаи дури и среде патување, бидејќи регионот влезе во процес на одвикнување од рускиот гас со кој беше поврзан со децении.

Сепак, количината на дополнителен ЛНГ што може да ги надомести изгубените руски текови во Европа може да падне на 35 отсто следното лето од 42 отсто зимава, соопшти BNEF. Сепак, испораките, главно од САД, треба да се зголемат со следниот бран проекти што ќе започне кон крајот на 2024 година. Европа, исто така, треба да го прошири капацитетот за увоз на ЛНГ и да ги олесни инфраструктурните тесни грла.

„САД ќе треба да го прошират својот капацитет за извоз на ЛНГ, а ЕУ ќе треба да го прошири својот увозен капацитет во следните неколку години“, наведува Rystad Energy во студијата.