.webp){kind=icon}
Регулаторната комисија за енергетика (РКЕ), заедно со регулаторните тела од Италија, Албанија, Босна и Херцеговина и Црна Гора, го основа Балканското училиште за енергетика (БУЕ) по иницијатива на Регулаторното тело за енергетика, мрежи и животна средина на Италија (АРЕРА).
Како што се наведува во соопштението од РКЕ, главна цел на Балканското училиште за енергетика е да овозможи едукација за најновите текови во енергетиката за претставниците на регулаторните тела, операторите на преносните системи, операторите на пазарите на енергија, како и други чинители во енергетскиот сектор. Меморандумот за основање е потпишан од страна на сите пет земји основачи, меѓу кои е и РКЕ. За прв претседател на Балканското училиште за енергетика е избран Стефано Саглиа, кој е член на одборот на Регулаторното тело за енергетика, мрежи и животна средина на Италија (АРЕРА).
„Енергетиката е во фокусот на вниманието на целиот свет и целото општество кај нас, а регулативите во овој сектор постојано се надградуваат и усогласуваат за да се обезбедат сигурност и стабилност во испораката на енергенти. Фокусот на едукација на новоформираното училиште ќе биде насочен кон развојот на мрежите за електрична енергија и природен гас, интеграција на обновливите извори за енергија и спојување на пазарите во рамките на енергетската транзиција и преку интензивно градење капацитети и размена на знаењата. Токму размената на искуства и споделувањето знаење како ефикасно се спроведува ЕУ-регулативата се неопходни, затоа што освен што се демонстрира единство во борба со предизвиците, во исто време кога ЕУ се бори со енергетски криза се дава и креативен простор за дискусија за решенија како да се заштитат ранливите граѓани, а да се обезбеди сигурна и стабилна испорака на енергенти“, изјави Марко Бислимоски, претседател на Регулаторната комисија за енергетика и водни услуги.
БУЕ потекнува од успешното искуство од проектот „Програма за размена на знаења“, промовиран и координиран од АРЕРА во последните четири години, во рамките на програмата што е финансирана од Централната европска иницијатива.
