Расте цената на златото

Цената на златото се зголеми и повторно ја премина границата од 1.800 долари, откако Кина направи уште еден пресврт во својата стратегија во борбата против коронавирусот. Тоа доведе до пораст на вредноста на акциите, што дополнително изврши притисок врз доларот.

Од почетокот на јануари, карантинот нема да биде задолжителен за патниците кои доаѓаат во Кина, одлучија властите на оваа азиска земја. Промената во пристапот за спречување на ширењето на вирусот придонесе инвеститорите да станат пооптимистични за втората по големина економија во светот.

Сличен ефект имаа и вестите за забавување на инфлацијата во САД, но и оние за помалата лична потрошувачка кај населението. Овој развој може да ги олесни работите за Федералните резерви, кои можеби нема да мора да ја затегнуваат монетарната политика колку што претходно се мислеше дека е неопходно.

Само во текот на овој квартал цената на златото порасна за осум отсто, а за растот на вредноста на благородниот метал придонесе и слабеењето на доларот, покрај околностите во врска со Федералните резерви.

Гледано по шангајско време, цената на златото околу 10 часот достигна 1.804,6 долари, по растот од околу 0,4 отсто. Индексот за доларот на „Блумберг“ изгуби 0,3 отсто од вредноста и е блиску до нивото од јуни. Зголемена е и вредноста на среброто, паладиумот и платината.

Во моментов нема коментари за веста. Биди прв да коментира...

Остави коментар