Златото падна по тридневниот раст од пет отсто поради колапсот на СВБ

Вредноста на златото падна, откако се зголеми за повеќе од пет проценти во текот на трите претходни сесии, бидејќи колапсот на големата американска банка поттикна бегство кон посигурни средства, како што е благородниот метал.

Неуспехот на банката од Силициумската Долина, „Силикон валеј банк“ (Silicon Valley Bank) - СВБ (SVB), во комбинација со остриот пад на приносите на државните обврзници и претходното слабеење на доларот беа благодат за златото. Неговиот скок од 2,4 отсто во понеделникот беше најголем од ноември. Но вчера зелената банкнота порасна за првпат по четири сесии на тргување, натежнувајќи го благородниот метал.

Покрај банкарската криза, златото добива поддршка од новите очекувања дека Федералните резерви (ФЕД) ќе бидат принудени да го ублажат агресивното монетарно затегнување поради ризиците што произлегуваат од колапсот на СВБ.

Приносите на американските десетгодишни обврзници од средата паднаа за повеќе од 40 базични поени, што е позитивно за некаматоносните златни прачки.

Движење на вредноста на златото во споредба со приносите од 10-годишните државни обврзници на САД / Bloomberg Mercury

 

„Двигателите за златото вклучуваат загриженост за потенцијалниот системски ризик додека се зголемуваат потенцијалните дефлациски и рецесиски ризици“, велат во белешката аналитичарите на „Ситигруп“ (Citigroup Inc), вклучувајќи го и Акаш Доши.

Можноста за повеќе проблеми за глобалната економија исто така предизвика притисок врз индустриските метали, кои се приклучија на бегството од ризичните средства. Цинкот се движи кон најниското затворање од ноември, а се повлече и бакарот.

Трговците внимателно ќе ги следат податоците за инфлацијата во САД што ќе се објават денеска, при што пазарот сега очекува дека турбуленцијата во банкарскиот сектор ќе го натера ФЕД да спроведе зголемување за четвртина поен на состанокот за монетарна политика, кој ќе се одржи на 21 и 22 март, наместо да се вратат на зголемување од половина поен.

„Додека податоците за потрошувачките цени остануваат критични, ние ги сметаме неодамнешните пазарни настани како структурна поддршка за цената на златото“, вели Доши од „Ситигруп“.

Вредноста на златото се намали за 0,6 проценти, паѓајќи на 1.902,74 долари за унца, а индексот на „Блумберг“ за вредноста на доларот (Bloomberg Dollar Spot Index) порасна за 0,2 отсто. Бакарот падна за 1,2 отсто, а цинкот за 0,5 отсто. Среброто падна по скокот од 6,2 проценти во понеделникот, а пад бележат и платината и паладиумот.