text size
Златото се стабилизира откако се искачи над границата од 2.000 долари за унца за првпат во една година. Ова следува откако договорот за купување на „Кредит Суис“ (Credit Suisse Group AG) не успеа целосно да ги намали стравувањата за глобалниот банкарски сектор.
Вредноста на златните прачки минатата недела се зголеми за 6,5 проценти, што претставува најголем неделен раст од почетокот на пандемијата, откако неколку регионални американски кредитори пропаднаа и се зголеми загриженоста за кондицијата на швајцарската банка.
Движење на вредноста на златото / Bloomberg Mercury
Денеска вредноста на златото, кое се смета за прибежиште во турбулентни услови на пазарите, се зголеми дури за еден отсто, бидејќи европските финансиски акции паднаа во пресрет на договорот за преземање на „Кредит Суис“, помогнат од владата.
„Третманот на обврзниците AT1 воведе нов извор на несигурност. Колку подолго трае неизвесноста, без целосно да се смират пазарните стравови, толку златото би можело да се тргува по повисоки цени“, напиша Маркус Гарви, раководител за стратегија за метали во „Меквајери“ (Macquarie Group Ltd).
Тоа претставува остар пресврт за златото, кое минатиот месец се лизна поради очекувањата дека Федералните резерви (ФЕД) ќе продолжат со агресивното монетарно затегнување со цел да ја ограничат инфлацијата. Оттогаш, тие облози се значително намалени, а трговците со свопови сега се поделени околу тоа дали централната банка повторно ќе ги зголеми каматите оваа година. Таквата ситуација е благодат за златото што не дава принос.
„Сега сите погледи ќе се свртат кон состанокот на ФЕД, кој ќе заврши в среда, каде што исходот ќе биде најтешко да се предвиди во споредба со последните години“, рече Оле Хансен, шеф за стратегија за стоки во „Саксо“ (Saxo Bank A/S).
Премин на креаторите на монетарните политики кон послаби перспективи во време кога инфлацијата останува жешка може уште повеќе да ја зголеми вредноста на златото.
Инаку, последен пат над границата од 2.000 долари златото се тргуваше во март 2022 година. Цената на среброто е сосема малку променета, додека платината и паладиумот паднаа.
„Дали златото ќе може да ги задржи овие добивки навистина ќе зависи од доларот. Го сметаме американскиот долар за посилно засолниште од златото. Тоа значи дека ако ризичните настани се доволно големи, обично ќе видиме дека пазарите се префрлаат од златото кон американскиот долар“, вели аналитичарот на „Комонвелт“ (Commonwealth Bank of Australia), Вивек Дар.
.webp){kind=icon}
